main raaste bhoolata hoon
aur iseelie nae raaste milate hain
main apanee neend se nikal kar pravesh karata hoon
kisee aur kee neend mein
is tarah punarjanm hota rahata hai
ek jindagee mein ek hee baar paida hona
aur ek hee baar marana
jin logon ko shobha nahin deta
main unheen mein se ek hoon
phir bhee nakshe par jagahon ko dikhaane kee tarah hee hoga
mera jindagee ke baare mein kuchh kahana
bahut mushkil hai bataana
ki prem kahaan tha kin-kin rangon mein
aur jahaan nahin tha prem us vaqt vahaan kya tha
paanee, neend aur andhere ke bheetar itanee chhaayaen hain
aur aapas mein praacheen darakhton kee jadon kee tarah
itanee guttham-guttha
ki ek do ko bhee nikaal kar
hava mein nahin dikha sakata
jis nadee mein gota lagaata hoon
baahar nikalane tak
ya to shahar badal jaata hai
ya nadee ke paanee ka rang
shaam kabhee bhee hone lagatee hai
aur unamen se ek bhee dikhaee nahin deta
jinake kaaran chamakata hai
akelepan ka patthar