loader image

hindoo aur musalamaan – a nazm by Ufuq Lakhnavi

fakhr-e-vatan hain donon aur donon muqtadar hain
hain phool ik chaman ke ik nakhl ke samar hain
ai qaum tere dukh ke donon hee chaaraagar hain
donon jigar jigar hain lekin digar digar hain
aapas ke tafaraqon se hain aah khaar donon
agyaar kee nazar mein hain be-vaqaar donon
mil kar chalo ki aakhir donon ho bhaee bhaee
bhaee se kya ladaee bhaee se kya buraee
kab tak ye khaana-jangee kab tak ye khud-sitaee
do bhaiyon ko haragiz zeba nahin judaee
mil kar gale nikaalo dil ka gubaar donon
is khaak ke ho putale paayaan-e-kaar donon
rashk-e-jinaan banao hindostaan ko mil kar
khoon-e-jigar se seencho is gulistaan ko mil kar
laharao aasamaan par qaumee nishaan ko mil kar
do aab-e-jaan-nisaaree nok-e-sinaan ko mil kar

hindoo aur musalamaan

871
By: Ufuq Lakhnavi

© 2022 Pothi | All Rights Reserved

Do not copy, Please support by sharing!