loader image

baavare aheree – a poem by Agyeya

bhor ka baavara aheree
pahale bichhaata hai aalok kee
laal-laal kaniyaan
par jab kheenchata hai jaal ko
baandh leta hai sabhee ko saath :
chhotee-chhotee chidiyaan, manjhole pareve, bade-bade pankhee
dainon vaale deel vaale daul ke baidaul
udane jahaaz
kalas-tisool vaale mandir-shikhar se le
taaraghar kee naatee motee chipatee gol ghusson vaalee upayog-sundaree
bepanaah kaayon ko :
godhoolee kee dhool ko, motaron ke dhune ko bhee
paark ke kinaare pushpitaagr karnikaar kee aalok-khachee tanvi roop-rekha ko
aur door kachara jalaane vaalee kal kee uddand chimaniyon ko, jo
dhuaan yon ugalatee hain maanon usee maatr se aheree ko hara dengee!

baavare aheree re
kuchh bhee avadhy nahin tujhe, sab aakhet hai :
ek bas mere man-vivar mein dubakee kalauns ko
dubakee hee chhod kar kya too chala jaega?
le, main khol deta hoon kapaat saare
mere is khandar kee shira-shira chhed ke aalok kee anee se apanee,
gadh saara dhaah kar dhooh bhar kar de :
viphal dinon kee too kalauns par maanj ja
meree aankhe aanj ja
ki tujhe dekhoon
dekhoon aur man mein krtagyata umad aaye
pahanoon sirope se ye kanak-taar tere –
baavare aheree.

Add Comment

© 2021 Pothi | All Rights Reserved

Do not copy, Please support by sharing!