loader image

dil mira jis se bahalata koee aisa na mila

dil mira jis se bahalata koee aisa na mila
but ke bande mile allaah ka banda na mila

bazm-e-yaaraan se phiree baad-e-bahaaree maayoos
ek sar bhee use aamaada-e-sauda na mila

gul ke khvaahaan to nazar aae bahut itr-farosh
taalib-e-zamazama-e-bulabul-e-shaida na mila

vaah kya raah dikhaee hai hamen murshid ne
kar diya kaabe ko gum aur kaleesa na mila

rang chehare ka to kolej ne bhee rakkha qaim
rang-e-baatin mein magar baap se beta na mila

sayyad utthe jo gazat le ke to laakhon lae
shaikh quraan dikhaate phire paisa na mila

hoshayaaron mein to ik ik se siva hain akabar
mujh ko deevaanon mein lekin koee tujh sa na mila

425

Add Comment

By: Akbar Allahabadi

© 2022 Pothi | All Rights Reserved

Do not copy, Please support by sharing!