loader image

sarvagun sampann striyaan – a poem by Anupma Vindhyavasini

sarvagun sampann striyaan
tez svar mein samvaad nahin kar sakateen, tab bhee
jabaki unaka man cheekhana chaahata hai,
doosaron ke kaanon tak apanee baat pahunchaane ke lie

ve svayan ko vyakt nahin kar sakateen, tab bhee
jabaki unake svatantr vichaar, unake mastishk se
baahar nikalane ko aatur hote hain

ve krodh nahin kar sakateen, tab bhee
jabaki ve asahamat hotee hain khokhalee roodhiyon se jo
banaayee gaee hotee hain, maatr striyon ke lie

ve aadee-tirachhee rotiyaan nahin bana sakateen, tab bhee
jabaki rotiyaan banaana unhen zara bhee nahin bhaata

sarvagun sampann striyaan
svayan banatee nahin hain,
samaaj unhen gadhata hai
apane vichaar un par thopakar
unakee chetana ko dhvast kar

sarvagun sampann striyaan
vahee nahin rah jaateen jo ve pahale theen
unaka vaastavik chaitany svaroop lupt ho jaata hai
ve kanthasth kar chukee hotee hain ki
rotiyaan banaana striyon ka mool kartavy hai
unakee sahanashakti, unake aatmasammaan se
zyaada ho jaatee hai
jab kisee din, unake bhaavon ka baandh
tootata hai,
tab kaun sa vikalp bachata hai unake paas
rone ke alaava?
us kshan, kadaachit,
aabhaar maanatee hon ve, us samaaj ka
jisakee drshti mein
‘rona’
striyon ka gunadharm hai!

Add Comment

By: Anupma Vindhyavasini

© 2021 Pothi | All Rights Reserved

Do not copy, Please support by sharing!