loader image

akele kyon? – a poem by Ashok Vajpayee

ham us yaatra mein
akele kyon rah jaenge?

saath kyon nahin aaega hamaara bachapan,
usakee aakaash-chadhatee patangen
aur lakadee ke chhote se tukade ko
hathiyaar bana kar digvijay karane ka udgam-
mile upahaaron aur churaayee cheezon ka ataala?

kyon peechhe rah jaega yuva hone ka adbhut aashchary,
deh ka prajvalit aakaash,
kuchh bhee kar sakane ka shabdon par bharosa,
amarata ka chhadm,
aur anant ka padosee hone ka aashvaasan?

kahaan rah jaega pakee ichchhaon ka dheeraj
sapane aur sach ke beech bana
bedarodeevaar ka ghar
aur agamy mein apane hee pairon kee chhaap se banaayee pagadandiyaan?

jeevan bhar ke saath-sang ke baad
ham akele kyon rah jaenge us yaatra mein?

jo saath the ve kis yaatra par
kis or jaenge?

ve nahin aaenge hamaare saath
to kya ham unake saath
ja paenge?

784

Add Comment

By: Ashok Vajpayee

© 2022 Pothi | All Rights Reserved

Do not copy, Please support by sharing!