loader image

dikqat kee shuruaat – a poem by Kumar Ambuj

socho to aakhir aadamee ke jeevan mein rakha hee kya hai
vah mushkil se rota-tadapata janm leta hai
phir roz-roz badhatee hee jaatee hain usakee mushkilen
unheen sabake beech vah hansata-gaata hai, ladata-jhagadata hai
aur hota hee rahata hai is duniya se asahamat

kabhee-kabhee beech mein dakhal dekar vah kah deta hai
ki aadamee ka jeevan aisa nahin balki aisa hona chaahie
nahin to aadamee zinda rahate hue bhee mar jaata hai

yah kahate hee vah ghir jaata hai chaaron taraf se
ghire hue aadamee kee phir kabhee kam nahin hoteen museebaten

aadamee ke jeevan mein rakha hee kya hai aakhir
vah marata to hai hee ek din
lekin dikqat yahaan se shuroo hotee hai ki use hamesha
us ek din se pahale hee maar diya jaata hai yah kah kar
ki aakhir aadamee ke jeevan mein rakha hee kya hai—
ek dhaayan ke alaava.

785
By: Kumar Ambuj

© 2022 Pothi | All Rights Reserved

Do not copy, Please support by sharing!