loader image

ant ka jeevan – a poem by Kumar Ambuj

khidakee se dikhatee ek rel guzaratee hai, bhaagatee hain jisakee roshaniyaan
ujaala nahin karateen, bhaagatee hain maano peechha chhudaana chaahatee hain andhere se
usakee aavaaz tharatharaahat bharatee hai lekin vah lohe kee aavaaz hai
usakee seetee kee aavaaz baaqee sabako dhvast karatee

aabaadee mein se rel guzaratee hai registaan paar karane ke lie
log jeevan mein se guzarate hain premaviheen aayu paar karane ke lie
aakhir ek din prem ke bina bhee log zinda rahane lagate hain
balki khush rahakar, naachate-gaate zinda rahane lagate hain
peechhe chhoot gaee baareeq, matamailee ret mein
mareechika jaisa bhee kuchh nahin chamakata

prem kee koee praagaitihaasik tasveer tangee rahatee hai deevaar par
tasveer par giratee hai baarish, dhool aur sheet girata hai,
raat aur din girate hain, use dhak leta hai kuhaasa,
usakee ot mein makadiyaan, chhipakaliyaan rahane lagatee hain
phir doctor kahata hai in dinon aansuon ka sookhana aam baat hai
isake lie to koee aajakal dava bhee nahin likhata

ek din sab jaan hee lete hain : prem ke bina koee mar nahin jaata

dheere-dheere is baat kee aapasee samajh ban jaatee hai
ki roz-roz mel-mulaaqaat mumakin nahin
saare visthaapit jaan chuke hain
ab ve kisee gaanv-qasbe ke nivaasee nahin

kuchh hee dooree par jo ek bahut bada complex hai
google-earth mein shahar ke naam par dikhatee hai isee imaarat kee tasveer
ab yahee gaganchumbee imaarat hai is shahar ka paryaayavaachee
laang shot mein hazaaron prakaashamaan khidakiyon se aalokit
yah kisee ujjval dveep kee tarah dikhaee detee hai

alabatta isee shahar mein aisee bhee khidakiyaan hain asankhy
jinake bheetar bhee rahe chale aate hain jeevit manushy
lekin udhar se koee roshanee nahin aatee
bas, dikhata hua khidakiyon ke aakaar ka andhera hai
jise aasapaas kee roshaniyaan aur zyaada gaadha karatee hain.

459
By: Kumar Ambuj

© 2022 Pothi | All Rights Reserved

Do not copy, Please support by sharing!