apane bikhare bhaavon ka main
goonth atapata sa yah haar.
chalee chadhaane un charanon par,
apane hiy ka sanchit pyaar.
dar tha kaheen upasthiti meree,
unakee kuchh ghadiyaan bahumooly
nasht na kar de, phir kya hoga
mere in bhaavon ka mooly?
sankochon mein doobee main jab
pahunchee unake aangan mein
kaheen upeksha karen na meree,
akulaee see thee man mein.
kintu are yah kya,
itana aadar, itanee karuna, sammaan?
pratham drshti mein hee de daala
tumane mujhe aho matimaan!
main apane jheene aanchal mein
is apaar karuna ka bhaar
kaise bhala sanbhaal sakoongee
unaka vah sneh apaar.
lakh mahaanata unakee pal-pal
dekh rahee hoon apanee or
mere lie bahut thee keval
unakee to karuna kee kor.
anokha daan