yahaan kokila nahin, kaag hain, shor machaate,
kaale kaale keet, bhramar ka bhram upajaate.
kaliyaan bhee adhakhilee, milee hain kantak-kul se,
ve paudhe, va pushp shushk hain athava jhulase.
parimal-heen paraag daag sa bana pada hai,
ha! yah pyaara baag khoon se sana pada hai.
o, priy rturaaj! kintu dheere se aana,
yah hai shok-sthaan yahaan mat shor machaana.
vaayu chale, par mand chaal se use chalaana,
duhkh kee aahen sang uda kar mat le jaana.
kokil gaaven, kintu raag rone ka gaaven,
bhramar karen gunjaar kasht kee katha sunaaven.
laana sang mein pushp, na hon ve adhik sajeele,
to sugandh bhee mand, os se kuchh kuchh geele.
kintu na tum upahaar bhaav aa kar dikhalaana,
smrti mein pooja hetu yahaan thode bikharaana.
komal baalak mare yahaan golee kha kar,
kaliyaan unake liye giraana thodee la kar.
aashaon se bhare hrday bhee chhinn hue hain,
apane priy parivaar desh se bhinn hue hain.
kuchh kaliyaan adhakhilee yahaan isalie chadhaana,
kar ke unakee yaad ashru ke os bahaana.
tadap tadap kar vrddh mare hain golee kha kar,
shushk pushp kuchh vahaan gira dena tum ja kar.
yah sab karana, kintu yahaan mat shor machaana,
yah hai shok-sthaan bahut dheere se aana.