loader image

yaad – a poem by Sumitranandan Pant

bida ho gaee saanjh, vinat mukh par jheena aanchal dhar,
mere ekaakee aangan mein maun madhur smrtiyaan bhar!
vah kesaree dukool abhee bhee phahara raha kshitij par,
nav asaadh ke meghon se ghir raha baraabar ambar!

main baraamade mein leta, shaiyya par, peedit avayav,
man ka saathee bana baadalon ka vishaad hai neerav!
sakriy yah sakarun vishaad,–meghon se umad umad kar
bhaavee ke bahu svapn, bhaav bahu vyathit kar rahe antar!

mukhar virah daadur pukaarata utkanthit bhekee ko,
barhabhaar se mor lubhaata megh-mugdh kekee ko;
aalokit ho uthata sukh se meghon ka nabh chanchal,
antaratam mein ek madhur smrti jag jag uthatee pratipal!

kampit karata vaksh dhara ka ghan gabheer garjan svar,
bhoo par hee aagaya utar shat dhaaraon mein ambar!
bheenee bheenee bhaap sahaj hee saanson mein ghul mil kar
ek aur bhee madhur gandh se hrday de rahee hai bhar!

nav asaadh kee sandhya mein, meghon ke tam mein komal,
peedit ekaakee shayya par, shat bhaavon se vihval,
ek madhuratam smriti pal bhar vidyut see jal kar ujval
yaad dilaatee mujhe hrday mein rahatee jo tum nishchal!

987

Add Comment

By: Sumitranandan Pant

© 2022 Pothi | All Rights Reserved

Do not copy, Please support by sharing!