aao baithen
isee dhaal kee haree ghaas par.
maalee-chaukeedaaron ka yah samay nahin hai,
aur ghaas to adhunaatan maanav-man kee bhaavana kee tarah
sada bichhee hai – haree, nyautatee, koee aa kar raunde.
aao, baitho.
tanik aur sat kar, ki hamaare beech sneh-bhar ka vyavadhaan rahe, bas,
nahin daraaren sabhy shisht jeevan kee.
chaahe bolo, chaahe dheere-dheere bolo, svagat gunagunao,
chaahe chup rah jao-
ho prakrtasth : tano mat katee-chhantee us baad sareekhee,
namo, khul khilo, sahaj milo
antahsmit, antahsanyat haree ghaas-see.
kshan-bhar bhula saken ham
nagaree kee bechain budakatee gadd-madd akulaahat –
aur na maanen use palaayan;
kshan-bhar dekh saken aakaash, dhara, doorva, meghaalee,
paudhe, lata dolatee, phool, jhare patte, titalee-bhunage,
phunagee par poonchh utha kar itaraatee chhotee-see chidiya-
aur na sahasa chor kah uthe man mein-
prakrtivaad hai skhalan
kyonki yug janavaadee hai.
kshan-bhar ham na rahen rah kar bhee :
sunen goonj bheetar ke soone sannaate mein kisee door saagar kee lol lahar kee
jis kee chhaatee kee ham donon chhotee-see siharan hain-
jaise seepee sada suna karatee hai.
kshan-bhar lay hon- main bhee, tum bhee,
aur na simaten soch ki ham ne
apane se bhee bada kisee bhee apar ko kyon maana!
kshan-bhar anaayaas ham yaad karen :
tiratee naav nadee mein,
dhool-bhare path par asaadh kee bhabhak, jheel mein saath tairana,
hansee akaaran khade maha-vat kee chhaaya mein,
vadan ghaam se laal, sved se jamee alak-lat,
cheedon ka van, saath-saath dulakee chalate do ghode,
geelee hava nadee kee, phoole nathune, bharraayee seetee steemar kee,
khandahar, grathit anguliyaan, baanse ka madhu,
daakiye ke pairon kee chaanp
adhajaanee babool kee dhool milee-see gandh,
jhara resham shireesh ka, kavita ke pad,
masajid ke gumbad ke peechhe soory doobata dheere-dheere,
jharane ke chamakeele patthar, mor-moranee, ghungharoo,
santhaalee jhoomur ka lamba kasak-bhara aalaap,
rel ka aah kee tarah dheere-dheere khinchana, laharen,
aandhee-paanee;
nadee kinaare kee retee par bitte-bhar kee chhaanh jhaad kee
angul-angul naap-naap kar tode tinakon ka samooh,
loo,
maun.
yaad kar saken anaayaas : aur na maanen
ham ateet ke sharanaarthee hain;
smaran hamaara – jeevan ke anubhav ka pratyavalokan-
hamen na heen banaave pratyabhimukh hone ke paap-bodh se.
aao baitho : kshan-bhar :
yah kshan hamen mila hai nahin nagar-sethon kee faiyaajee se.
hamen mila hai yah apane jeevan kee nidhi se byaaj sareekha.
aao baitho : kshan-bhar tumhen nihaaroon.
apanee jaanee ek-ek rekha pahachaanoon
chehare kee, aankhon kee – antarman kee
aur – hamaaree saajhe kee anagin smrtiyon kee :
tumhen nihaaroon
jhijhak na ho ki nirakhana dabee vaasana kee vikrti hai!
dheere-dheere
dhundhale mein chehare kee rekhaen mit jaayen –
keval netr jagen : utanee hee dheere
haree ghaas kee pattee-pattee bhee mit jaave lipat jhaadiyon ke pairon mein
aur jhaadiyaan bhee ghul jaaven kshiti-rekha ke masrn dhvaant mein;
keval bana rahe vistaar – hamaara bodh
mukti ka,
seemaaheen khulepan ka hee.
chalo, uthen ab;
ab tak ham the bandhu sair ko aaye –
(dekhe hain kya kabhee ghaas par lot-pot hote satabhaiye shor machaate?)
aur rahe baithe to log kahenge
dhundhale mein dubake premee baithe hain.
vah ham hon bhee to yah haree ghaas hee jaane :
(jis ke khule nimantran ke bal jag ne sada use raunda hai
aur vah nahin bolee),
nahin sunen ham vah nagaree ke naagarikon se
jin kee bhaasha mein atishay chikanaee hai saabun kee
kintu nahin hai karuna.
utho, chalen, priy.