mere pahaloo mein jo bah nikale tumhaare aansoo
ban gae shaam-e-mohabbat ke sitaare aansoo
dekh sakata hai bhala kaun ye paare aansoo
meree aankhon mein na aa jaen tumhaare aansoo
sham ka aks jhalakata hai jo har aansoo mein
ban gae bheegee huee raat ke taare aansoo
menh kee boondon kee tarah ho gae saste kyoon aaj
motiyon se kaheen mahange the tumhaare aansoo
saaf iqaraar-e-mohabbat ho zabaan se kyoonkar
aankh mein aa gae yoon sharm ke maare aansoo
hijr abhee door hai main paas hoon ai jaan-e-vafa
kyoon hue jaate hain bechain tumhaare aansoo
subh-dam dekh na le koee ye bheega aanchal
meree chugalee kaheen kha den na tumhaare aansoo
apane daamaan o garebaan ko main kyoon pesh karoon
hain mire ishq ka inaam tumhaare aansoo
dam-e-rukhsat hai qareeb ai gam-e-furqat khush ho
karane vaale hain judaee ke ishaare aansoo
sadaqe us jaan-e-mohabbat ke main ‘akhtar’ jis ke
raat bhar bahate rahe shauq ke maare aansoo..
Closeclose