loader image

kuchh to tanhaee kee raaton mein sahaara hota

kuchh to tanhaee kee raaton mein sahaara hota
tum na hote na sahee zikr tumhaara hota

tark-e-duniya ka ye daava hai fuzool ai zaahid
baar-e-hastee to zara sar se utaara hota

vo agar aa na sake maut hee aaee hotee
hijr mein koee to gam-khvaar hamaara hota

zindagee kitanee masarrat se guzaratee ya rab
aish kee tarah agar gam bhee gavaara hota

azmat-e-girya ko kotaah-nazar kya samajhen
ashk agar ashk na hota to sitaara hota

lab-e-zaahid pe hai afsaana-e-hoor-e-jannat
kaash is vaqt mira anjuman-aara hota

gam-e-ulfat jo na milata gam-e-hastee milata
kisee soorat to zamaane mein guzaara hota

kis ko fursat thee zamaane ke sitam sahane kee
gar na us shokh kee aankhon ka ishaara hota

koee hamadard zamaane mein na paaya ‘akhtar’
dil ko hasarat hee rahee koee hamaara hota

1

Add Comment

By: Akhtar Sheerani

© 2021 Pothi | All Rights Reserved

Do not copy, Please support by sharing!