loader image

antarvyatha (neeche ke kapade) – a story by Amrita Pritam

jisake man kee peeda ko lekar mainne kahaanee likhee thee- ‘neeche ke kapade’, usaka naam bhool gaee hoon. kahaanee mein sahee naam likhana nahin tha, aur usase ek baar hee mulaaqaat huee thee, isalie naam bhee yaad se utar gaya hai…

jab vah milane aayee thee, beemaar thee. khoobasoorat thee, par rang aur man utara hua tha. vah ek hee vishvaas ko lekar aayee thee ki main usake haalaat par ek kahaanee likh doon…

mainne poochha- “isase kya hoga?”

kahane lagee- “jahaan vah chitthiyaan padeen hain jo main apane haathon se nahin phaad sakatee, unheen chitthiyon mein vah kahaanee rakh doongee… mujhe lagata hai, main bahut din zinda nahin rahoongee, aur baad mein jab un chitthiyon se koee kuchh jaan paega, to mujhe vah nahin samajhega jo main hoon. aap kahaanee likhengee to vaheen rakh doongee. ho sakata hai, usakee madad se koee mujhe samajh le, meree peeda ko sambhaal le. mujhe aur kisee ka kuchh fikr nahin hai, par mera ek beta hai, abhee vah chhota hai, vah bada hoga to main sochatee hoon ki bas vah mujhe galat na samajhe…”

usakee zindagee ke haalaat sachamuch bahut ulajhe hue the aur meree pakad mein nahin aa raha tha ki main unhen kaise samet paoongee. likhane ka vaada to nahin kiya par kaha ki koshish karoongee!

main bahut din vah kahaanee nahin likh paayee. sirf ek ahasaas sa bana raha ki usaka bachcha mere zehan mein bada ho raha hai, itana bada ki ab bahut see cheezen usake haath lagatee hain, to vah hairaan unhen dekhe ja raha hai.

kahaanee prakaashit huee aur bahut din guzar gae. main jaan nahin paayee ki usake haathon tak pahunchee ya nahin. sab vaqt ke sahaare chhod diya. usaka koee ata-pata mere paas nahin tha.

ek arasa guzar gaya tha, jab ek din fon aaya, dillee se nahin tha, kaheen baahar se tha. aavaaz thee- “aapaka bahut shukriya! mainne kahaanee vaheen rakh dee hai jahaan chaahatee thee.”

itane bhar lafzon se kuchh pakad mein nahin aaya tha, isalie poochha- “aap kaun bol rahee hain? kaun see kahaanee?”

javaab mein bas itanee aavaaz thee- “bahut door se bol rahee hoon, vahee jisakee kahaanee aapane likhee hai- ‘neeche ke kapade’… aur fon kat gaya.

“neeche ke kapade???”

achaanak mere saamane kaee log aakar khade ho gae hain, jinhonne kamar se neeche koee kapada nahin pahana hua hai.

pata nahin mainne kahaan padha tha ki khaanaabadosh auraten apanee kamar se apanee ghagharee kabhee nahin utaaratee hain. mailee ghagharee badalanee ho to sir kee or se naee ghagharee pahanakar, andar se mailee ghagharee utaar detee hain aur jab kisee khaanaabadosh aurat kee mrtyu ho jaatee hai to usake shareer ko snaan karaate samay bhee usakee neeche kee ghagharee salaamat rakhee jaatee hai. kahate hain, unhonne apanee kamar par padee nefe kee lakeer mein apanee muhabbat ka raaz khuda kee makhalooq se chhipaakar rakha hota hai. vahaan ve apanee pasand ke mard ka naam gudavaakar rakhatee hain, jise khuda kee onkh ke siva koee nahin dekh sakata.

aur shaayad yahee rivaaj mardon ke tahamadon ke baare mein bhee hota hoga.

lekin aise naam godane vaala zaroor ek baar auraton aur mardon kee kamar kee lakeer dekhata hoga. use shaayad ek pal ke lie khuda kee onkh naseeb ho jaatee hai, kyonki vah khuda kee makhalooq kee ginatee mein nahin jaata.

lekin meree onkh ko khuda kee aankh vaala shaap kyon mil gaya? main apane saamane aisee auraten aur mard kyon dekh raha hoon, jinhonne kamar se neeche koee kapada nahin pahan rakha hai, jinhen dekhana saaree makhalooq ke lie gunaah hai?

kal se maan aspataal mein hai. usake praan usakee saanson ke saath doob aur utara rahe hain. aisa pahale bhee kaee baar hua hai aur do baar pahale bhee use aspataal le jaaya gaya tha, par is baar shaayad usake man ko jeene ka vishvaas nahin bandh raha hai. achaanak usane ungalee mein se heere vaalee angoothee utaaree aur mujhe dekar kaha ki main ghar jaakar usakee lohe vaalee alamaaree ke khaane mein rakh doon.

aspataal mein abhee daadee bhee aayee theen, paapa bhee, mera bada bhaee bhee, lekin maan ne na jaane kyon, yah kaam unhen nahin saumpa. ham sab lautane lage the, jab maan ne ishaare se mujhe thaharane ke lie kaha. sab chale gae to usane takie ke neeche se ek musa hua rumaal nikaala, jisake kone se do chaabiyaan bandhee huee theen. rumaal kee kasee huee gaanth kholane kee usamen shakti nahin thee, isalie mainne vah gaanth kholee. tab ek chaabhee kee or ishaara karake usane mujhe yah kaam saumpa ki main usakee heere kee angoothee alamaaree ke andar khaane mein rakh doon. yah bhee bataaya ki andar vaale kee chaabhee mujhe usee alamaaree ke ek dibbe mein padee huee mil jaegee.

aur phir maan ne dheere se yah bhee kaha ki main bambee vaale chaachaajee ko ek khat daal doon, dillee aane ke lie. aur doosaree chaabhee usane usee tarah rumaal mein lapetakar apane takie ke neeche rakh lee.aur jis tarah taqadeeren badal jaatee hain usee tarah chaabhiyaan bhee badal gaeen.

ghar mein roz ke istemaal kee maan kee ek hee alamaaree hai, lekin phaalatoo saamaan vaalee kotharee mein lohe kee ek aur bhee alamaaree hai, jisamen phate-puraane kapade pade rahate hain. paapa ke traansaphar ke samay vah alamaaree lagabhag toot hee gaee thee, par maan ne use phenka nahin tha aur saakad-bhaakad vaalee us alamaaree ko phaalatoo kapadon ke lie rakh liya tha.

ghar pahunchakar jab main maan kee alamaaree kholane laga, to vah khulatee hee na thee. chaabhee meree taqadeer kee tarah badalee huee thee. haath mein thaamee huee heere kee angoothee ko kaheen sambhaalakar rakhana tha, isalie mainne saamaan vaalee kotharee kee alamaaree khol lee. yah chaabhee us alamaaree kee thee. is alamaaree mein bhee andar ka khaana tha. mainne socha, usakee chaabhee bhee zaroor isee alamaaree ke kisee dibbe mein hee milanee thee.

aur main phate-puraane kapadon kee tahen kholane laga…

puraane, udhade hue salame ke kuchh kapade the, jo maan ne shaayad unaka suchcha salama bechane ke lie rakhe hue the aur paapa ke garm kot bhee the, jo shaayad bartanon se badalane ke lie maan ne sambhaalakar rakhe hue the. mainne ek baar galee mein bartan bechane vaalee auraton se maan ko ek puraane kot ke badale mein bartan khareedate hue dekha tha.

par main hairaan hua- maan ne ve sab toote hue khilaune bhee rakhe the, jinase main chhutapan mein khela karata tha. dekhakar ek dahashat see aayee- chaabhee se chalane vaalee relagaadee is tarah ulatee huee thee, jaise pataree se gir gaee ho aur us bhayaanak durghatana se usake sabhee musaafir ghaayal ho gae hon, plaastik kee gudiya, jo ek aankh se kaanee ho gaee thee, rabad ka haathee, jisakee soond beech mein se toot gaee thee, mittee ka ghoda, jisakee agalee donon taangen jaise kat gaee hon aur kuchh khilaunon kee sirf taangen aur baahen bikharee padee theen – jaise unake dhad aur sir udakar kaheen door ja pade hon- aur ab unhen pahachaana bhee nahin ja sakata tha…

mere shareer mein ek kampan see daud gaee- dekha ki in ghaayal khilaunon ke paas hee mittee kee banee shivajee kee moorti thee, jo donon baahon se lunjee ho gaee thee aur khayaal aaya – jaise devata bhee apaahij hokar baitha hua hai.

jahaan tak yaad aaya, laga ki mera bachapan bahut khushee mein beeta tha. bade bhaee ke janm ke saat baras baad mera janm hua tha, isalie mere bahut laad hue the. tab tak vaise bhee paapa kee tarakkee ho chukee thee, isalie mere vaaste bahut saare kapade aur bahut saare khilaune khareede jaate the… lekin pooree yaadon ke lie in toote hue khilaunon kee maan ko kya zaroorat thee, samajh mein nahin aaya…

sirf khilaune hee nahin, mere phate hue kapade bhee tahon mein lage hue the- toote hue batanon vaale chhote-chhote kurate, tootee huee taniyon vaale jhabale aur phatee huee juraaben bhee…

aur phir mujhe ek rumaal mein bandhee huee vah chaabhee mil gaee, jise main dhoondh raha tha. alamaaree ka andar vaala khaana khola, taaki heere kee angoothee usamen rakh doon.

yahee vah ghadee thee jab mainne dekha ki us khaane mein sirf neeche pahanane vaale kapade pade hue the… aur achaanak mere saamane ve log aakar khade ho gae hain jinake sir bhee dhanke hue hain, baahen bhee, oopar ke shareer bhee- lekin kamar se neeche koee kapada nahin hai… pralay ka samay shaayad aisa hee hota hoga, maaloom nahin. mere saamane meree maan khadee huee hai, paapa bhee, bambee vaale chaacha bhee aur koee ek misej chopada bhee aur ek koee mis nanda bhee- jinhen main jaanata nahin.

aur khoe hue se hosh se mainne dekha ki unake beech mein kaheen bhee main bhee guchchha sa banakar baitha hua hoon…

na jaane yah kaun sa yug hai, shaayad koee bahut hee puraanee sadee, jab log pedon ke patton mein apane ko lapeta karate the.. aur phir pedon ke patte kaagaz jaise kab ho gae, nahin jaanata! alamaaree ke khaane mein sirf kaagaz pade hue hain, bahut se kaagaz jin par har ek ke tan kee vyatha likhee huee hai- tan ke taap jaisee, tan ke paseene jaisee, tan kee gandh jaisee!

ye sab khat hain, bambee vaale chaachaajee ke aur sab meree maan ke naam hain. tarah-tarah kee gandh mere sir ko chadh rahee hai.. kisee khat se khushee aur udaasee kee milee-julee gandh uth rahee hai. likha hai,

“veenoo! jo aadam aur havva khuda ke bahisht se nikaale gae the- vah aadam main tha aur havva tum theen…”

kisee khat se vishvaas kee gandh uth rahee hai-

“veenoo ! main samajhata hoon ki patnee ke taur par tum apane pati ko inkaar nahin kar sakatee, lekin tumhaara jism meree nazar mein ganga kee tarah pavitr hai aur main shivajee kee ganga ko jata mein dhaaran kar sakata hoon.”

kisee khat se niraasha kee gandh uth rahee hai-

“main kaisa raam hoon, jo apanee seeta ko raavan se nahin chhuda sakata… na jaane kyon, eeshvar ne is janam mein raam aur raavan ko sage bhaee bana diya!”

kisee khat se dilajoee kee gandh uth rahee hai-

“veenoo! tum man mein gunaah ka ahasaas na kiya karo. gunaah to usane kiya tha, jisane misej chopada jaisee aurat ke lie tumhaare jaisee patnee ko bisaar diya tha.”

aur achaanak ek hairaanee kee gandh mere sir ko chadhee, jab ek khat padha-

“tum mujhase khushanaseeb ho veenoo! tum apane bete ko beta kah sakatee ho, lekin main apane bete ko kabhee bhee apana beta nahin kah sakoonga.”

aur adhik hairaanee kee gandh se mere sir mein ek daraar pad gaee, jab ek doosare khat mein mainne apana naam padha. likha tha-

“meree jaan veenoo! ab tum udaas na hua karo. main nanhen se akshay kee soorat mein har vaqt tumhaare paas rahata hoon. din mein main tumhaaree god mein khelata hoon aur raat ko tumhaare paas sota hoon.”

so main… main…

zindagee ke unnees baras main jise paapa kahata raha tha, achaanak us aadamee ke vaaste yah lafz mere hothon par jhootha pad gaya hai.

baaqee khat mainne poore hosh mein nahin padhe, lekin itana jaana hai ki janm se lekar mainne jo bhee kapada shareer par pahana hai, vah maan ne kabhee bhee apane pati kee kamaee se nahin khareeda tha. mittee ka khilauna tak bhee nahin. mere skool kee aur kolej kee feesen bhee vah ghar ke kharch mein se nahin detee thee.

yah bhee jaana hai ki bambee mein akele rahane vaale aadamee se kuchh aisee baaten bhee huee theen, jinake lie kaee khaton mein maafiyaan maangee gaee hain, aur us silasile mein kaee baar kisee mis nanda ka naam likha gaya hai, jo khat likhane vaale kee nazaron mein ek aavaara ladakee thee, jisane menaka kee tarah ek rshi kee tapasya bhang kar dee thee… aur kaee khaton mein maan ko jhidakiyaan see dee gaee hain ki ye sirf usake man ke vaham hain, jinake kaaran vah beemaar rahane lagee hain.

yah maan, paapa, chaacha, misej chopada, mis nanda- koee bhee khaanaabadoshon ke kaafilon mein se nahin hai, par khaanaabadoshon kee parampara shaayad saaree manushy jaati par laagoo hotee hai, sabakee ghaghariyon aur sabake tahamadon par, jahaan unake shareer par padee unake nefe kee lakeer par likha hua naam eeshvar kee aankh ke siva kisee ko nahin dekhana chaahie.… aur pata nahin lagata ki aaj meree aankh ko eeshvar kee aankh vaala shaap kyon lag gaya hai.

sirf yah jaanata hoon ki eeshvar kee aankh eeshvar ke chehare par ho to varadaan hai, lekin insaan ke chehare par lag jae to shaap ho jaatee hai….

1

Add Comment

By: Amrita Pritam

© 2023 Pothi | All Rights Reserved

Do not copy, Please support by sharing!