padha gaya hamako
jaise padha jaata hai kaagaz
bachchon kee phatee kopiyon ka
chanaazoragaram ke lifaafe ke banane se pahale!
dekha gaya hamako
jaise ki kuft ho uneende
dekhee jaatee hai kalaee ghadee
alassubah alaarm bajane ke baad!
suna gaya hamako
yon hee udate man se
jaise sune jaate hain filmee gaane
saste kaiseton par
thasaathass thunsee huee bas mein!
bhoga gaya hamako
bahut door ke rishtedaaron ke duhkh kee tarah
ek din hamane kaha-
ham bhee insaan hain
hamen qaayade se padho ek-ek akshar
jaise padha hoga bee.e. ke baad
naukaree ka pahala vigyaapan.
dekho to aise
jaise ki thithurate hue dekhee jaatee hai
bahut door jalatee huee aag.
suno hamen anahad kee tarah
aur samajho jaise samajhee jaatee hai
nayee-nayee seekhee huee bhaasha.
itana sunana tha ki adhar mein latakatee huee
ek adrshy tahanee se
tiddiyaan udeen aur rangeen afavaahen
cheekhatee huee cheen-cheen
‘dushcharitr mahilaen, dushcharitr mahilaen
kinheen saraparaston ke dam par phoolee-phailee
agaradhatt jangal lataen!
khaatee-peetee, sukh se oobee
aur bekaar bechain, aavaara mahilaon ka hee
shagal hain ye kahaaniyaan aur kavitaen.
phir, ye unhonne thode hee likhee hain.’
(kanakhiyaan ishaare, phir kanakhee)
baaqee kahaanee bas kanakhee hai.
he paramapitaon,
paramapurushon,
bakhsho, bakhsho, ab hamen bakhsho!