munh andhere uthakar
ghar ke kaam nipata kar
vidyaalay jaatee bachchiyaan
vidyaalay jisake daravaaze par likha hai
‘andhere se ujaale kee or’
ghar se pit kar aaee shikshika
sooje hue haath se likh rahee hai bord par
maulik adhikaar
aathaveen kaksha kee garbhavatee ladakee
prashnottar rat rahee hain vigyaan ke ‘prajanan’ paath se
manch se mahila panch ne
ghoonghat mein hee bhaashan diya
mahila utthaan ka
taaliyaan bajee bahut zor se
sahamatee aur ullaas ke saath
bhaashan par nahin, soochana par
jo chipak kar aaee thee bhaashan ke saath hee
soochana jo ‘karavaachauth’ ke avasar par aadhe din chhuttee kee thee
laut rahee hain bachchiyaan, garbhavatee ladakee, pitakar aaee adhyaapika aur ghoonghat mein mahila panch
apane-apane ghar vaapas
vidyaalay se, jisake daravaaze par likha hai
andhere se ujaale kee or
laut rahee hain sab ek saath
apana-apana ujaala liye…