1
jab pita pitaon se nahin hote
chhod dete hain apanee shaasak chhavi
aur apanee betiyon ke saath khade hote hain
usee tarah jab bhaee bahanon se ho jaate hain
apanee bahanon kee premakathaon ko apane bheetar mahafooz rakhate hain
apanee bahanon kee aazaadee ke lie ladate hain
aise pati bhee hain jo patniyon ke svaamee nahin hue
apanee patniyon kee saheliyon se ban jaate hain
aise pita, pati aur bhaee
unake chehare par striyon jaisee hee yaatra dikhaayee detee
unhen stree hee kaha jaata hai
isaka matalab do tarah se liya jaata hai
ek gaalee aur ek gun kee tarah
lekin ye donon hee tarah se vyavastha ko chunautee dete
aise purush har samay kee paidaish hote hain
aur apane purushatv ke saath hee stree hona band nahin karate.
2
kabhee-kabhee maanen bhee pitaon kee paribhaasha mein utar jaatee hain
apane streetv ke saath hee, bina shaasak hue
apane bachchon ko surakshit kavach detee
srjan kee pooree zimmedaaree nibhaatee hueen
theek apanee paribhaasha ke vipareet
vo sab kaam karatee hain
jo pitaon ke lie rache gae hain
kabhee-kabhee bahanon ka saahas
kamazor bhaiyon kee taakat ban jaata hai
pashuon kee tarah haankee huee patniyaan
mahatvapoorn aur antim nirnay letee hai
danke kee chot par
vaise hee jaise apekshit chhavi mein mard lete hain
is tarah striyon ka purushon-sa hona
purushon ka striyon-sa hona
ek praakrtik gun kee tarah
pravaahit hota rahata hai
aur laingik dhaanchon ke saare sootr tootate rahate hain.