loader image

tamaashe mein dooba hua desh

main pahale kahaaniyaan likha karata tha. ab mainne kahaaniyaan likhana chhod diya hai kyonki kahaanee likhane se koee baat nahin banatee. jhoothe sachche paatr gadhana, idhar udhar kee ghatanaon ko sametana, chatapate sanvaad likhana, apanee padhee huee kitaabon kee jaanakaariyon aur apane gyaan ko kahaanee mein ulat dene se kya hota hai? main apane doosare kahaaneekaar mitron ko salaah deta hoon ki ve kahaanee vahaanee likhane ka kaam chhod den. hamaare is desh mein jahaan roj, har pal, har jagah kahaanee se jyaada nirmam ghat raha ho vahaan kahaanee likhana bekaar kee baat hai. apane chaaron taraph nigaah utha kar dekhie, aapako bikharee padee kahaaniyaan dekh kar apane kahaaneekaar hone par sharm aaegee jo mujhe aa chukee hai aur mainne kahaaniyaan likhana band kar diya hai. lekin choonki likhane kee aadat pad chukee hai aur likhe bina chain bhee nahin aata isalie socha hai main kahaaniyaan na likh kar ‘vaakya’ likha karoonga.

‘vaakya’ urdoo ka shabd hai jisaka matalab ‘ghatana’ nikaala ja sakata hai lekin shaayad baat pooree banegee nahin. ‘vaakya’ kisee aisee sachchee ghatana ka vivaran kaha ja sakata hai jo rochak, naatakeey aur manoranjak ho. keval ghatana maatr na ho. agar main aapako sirph ghatanaen sunaane lagoonga to usamen kuchh maja na aaega aur aap mujhe bevakooph aur moorkh samajh kar padhana band kar denge. ho sakata hai yah kaam aap ‘vaakya’ sunane ke baad bhee karen lekin mujhe ab bhee ummeed hai ki aur kuchh karen ya na karen ‘vaakye’ ko sun lenge. yah sachcha vaakya hai. baharahaal sachchaee to vaise bhee saamane aa jaegee. mere kahane se na sach jhooth ho sakata hai aur na jhooth sach ho jaega.

hamaare hee desh ke ek shahar mein ek aadamee gaayab ho gaya aur do kutte ke pille gaayab ho gae. main shahar ka naam nahin bataoonga kyonki vaakyaanigaar hone ka yah matalab nahin hai ki main logon ka dil dukhaoon aur apana jeena haraam kar loon. aap jaanate hee hain ki aaj hamaare ahinsak desh mein har tarah kee hinsa tarakkee par hai. pahale jo baat too too main main par khatm ho jaatee vah ab hatya ka kaaran ban jaatee hai. ab to hatyaaron ka sammaan hota hai. main jis ilaake ka rahanevaala hoon vahaan jisane jitanee hatyaen kee hotee hain usaka utana sammaan hota hai. yahee kaaran hai ki aaj tak mere ilaake mein mera sammaan nahin ho saka hai kyonki main makkhee maarane laayak bhee nahin hoon. sammaan ke maanadand badal gae hain. ise saabit karane ke lie misaal ke lie ek aur vaakya bhee hai.

vidhaan sabha ke chunaav ho jaane ke baad kuchh netaagan vidhaayak kainteen mein baithe baatacheet kar rahe the aur sab ek doosare se poochh rahe the ki aapane kahaan se ‘kantest’ kiya tha. dhyaan den ki unamen lokatantr kee bhaavana kitanee prabal thee. ve haarane ya jeetane kee baat nahin kar rahe the, keval ‘kantest’ karane kee baat kar rahe the. sabane bataaya ki unhonne kahaan kahaan se ‘kantest’ kiya hai. ek aadamee se poochha gaya to usane kaha ki mainne kaheen se ‘kantest’ nahin kiya hai. sab use dekh kar hairat mein pad gae aur kaha, jaie ja kar kauntar se chhah chaay le aaie.

ab baat lokatantr kee shuroo ho gaee hai to ek vaakya aur sunate chalie. vidhaan sabha ke saamane kisee mudde par anishchitakaaleen anashan jaaree tha. kisee saamaajik sarokaar ke mudde par kisee sanstha kee or se pratidin ek aadamee anashan par baithata tha. main udhar se gujar raha tha. mainne dekha ki anashan par baitha aadamee to pammee sharma hai. main use jaanata hoon. vah ubharata hua neta hai aur usane apane lie sabhee paartiyon ke daravaaje khule rakhe hain. mainne socha kyon na pammee sharma se mil loon, aisee kathin ghadee mein mere do shabd use taakat denge aur phir pammee se koee kaam pada to use yaad rahega ki mainne kathin kshanon mein usase kuchh achchhe shabd kahe the. garaj yah ki main usake paas gaya. vah mujhe dekh kar itana khush ho gaya jitana pahale na hota tha. usane bataaya ki anashan chaalees din se chal raha hai, mujhe apane desh ke vikasit lokatantr par garv hua. mainne usakee taareeph kee. usane kaha – ‘yaar, ek din ke lie tum bhee anashan par baith jao.’

main pahale to chaunka, kuchh ghabaraaya par usane kaha – ‘yaar ek din kee to baat hai, subah baithoge… shaam ko khatm ho jaega.’

main taiyaar ho gaya. socha theek hai yaar desh kee lokatantrik taakaton ko majaboot karane ke lie itana to karana chaahie.

main agale din subah hee subah vahaan pahunch gaya. vahaan saat aath log chaay pee rahe the. pammee sharma bhee tha. usane mujhe gaddee par baithaaya. gale mein gende ke phoolon kee maala daalee. tilak lagaaya. mera anashan jaaree ho gaya. main apanee aatma ko utphull mahasoos karane laga. thodee der mein pammee mere paas aaya aur bola – ‘kisee aadamee ka intijaam kar lena.’

main hairat se usakee taraph dekhane laga. vah samajh gaya tha ki main abhee tak nahin samajh paaya hoon.

vah bola – ‘jo anashan se hatega… use tentavaale ka, chaayavaale ka, joosavaale ka, maalee ka ‘pement’ karana hoga.’

mere to pairon tale se jameen nikal gaee. mainne gidagidaate hue kaha – ‘yaar, us sangathan ke log kahaan hain jinhonne anashan karaaya hai?’ usane kaha – ‘ve to sab apane apane ghar chale gae hain… tumhen kuchh nahin karana bas ek aadamee ka intijaam kar lo… aur suno…’ vah jaane se pahale bola – ‘shaam ko joosavaale se joos manga lena, usake yahaan bhee hisaab chal raha hai.’ pammee chala gaya.

pammee ne apanee topee mere sir mein phit kar dee thee. main ab samajha ki yahee hai hamaara lokatantr. ab mere saath kya hua yah main aapako nahin bataoonga. bas yah samajh leejie ki ab main us shahar nahin jaata jahaan anashan par baitha tha. kyonki tentavaala, chaayavaala, joosavaala, maalee sab mujhe talaash kar rahe hain. pammee se mainne jab yah bataaya tha ki yaar tentavaala, chaayavaala vagaira mujhe khoj rahe hain to vah laaparavaahee se bola tha – ‘khojane do saalon ko, is desh mein yahee ho raha hai. kisee na kisee ko koee na koee khoj raha hai aur kisee ko koee nahin milata. tum aaraam se apane likhane padhane ke kaam mein lag jao.’

main pammee kee salaah par likhane padhane ke kaam mein lag gaya hoon tab hee yah vaakya likh raha hoon.

maaph keejiega mainne baat shuroo kee thee, ek shahar mein ek aadamee aur kutte ke pillonke gaayab hone se lekin hote huaate main desh ke lokatantr par aa gaya. darasal vaakyaanigaaron kee yahee kamee hotee hai, vo baat shuroo to kar dete hain par jaanate nahin ki baat kahaan pahunchegee.

to janaab ek shahar mein ek aadamee gaayab ho gaya. usakee patnee pata chalaane pulis ke paas gaee to pulis ne kaha ki abhee tak koee sirakatee laash nahin milee hai, jaise hee milegee use bata diya jaega. aadamee kee patnee yah sun kar dar gaee. pulis ne kaha – ‘is desh mein maut se darogee to rah hee nahin sakatee. ham log maut se nahin darate. aatma par hamaara vishvaas hai. mauten to is desh mein aise aatee hain jaise doosare deshon mein bahaar aatee hai. dekho das paanch hajaar auraten to jala dee jaatee hain, das bees hajaar sadakon par kuchal kar mar jaate hain, pata nahin kitane dangon mein maar die jaate hain, akaal aur baadh kee to poochho hee mat. naukaree paane ke ichchhuk golee kha kar mar jaate hai. aatankavaadee hajaaron ko maar daalate hain. to desh kya hai boochadakhaana hai. ab kaajal kee kotharee mein rah kar kaala hone se kya darana… shukr kar, tere aadamee kee abhee laash nahin milee hai. ho sakata hai apaharan ho gaya ho. phirautee ke lie chitthee ya phon aae.’

aurat bolee – ‘daroga jee, hamaare paas kya hai jo koee phirautee ke lie agava karega! do taim khaane ko nahin jutata.’

‘tab to apaharan kee trening lenevaalon ne abhyaas ke taur par tere pati ka apaharan kar liya hoga.’

‘ye kya hota hai daroga jee.’

‘dekh, desh mein bahut se praivet skool kaalij khul gae hain. apaharan udyog ke ritaayard logon ne mil kar ‘apaharan kaalij’ khol diya hai. achchhee phees lete hain… ve apane chhaatron se kahate hain ki namoone ke taur par kisee ka apaharan karake dikhao… ve log tere pati ko chhod denge… basharte ki …’ pulisavaala bolate bolate ruk gaya.

‘kya basharte ki daroga jee?’ aurat ne poochha.

‘dekh, yah bhee ho sakata hai ki apaharan ke prayog ke baad unhonne tere pati ko kisee doosare skool mein pahuncha diya ho.’

‘kya matalab daroga jee?’

‘dekh hatya karana, golee maarana, gala kaatana aadi aadi sikhaane ke bhee to skool khule hain na?’

aurat rone lagee. pulis bolee – ‘ro mat, ho sakata hai maanav angon kee taskaree karanevaale kisee giroh ne pakad liya ho. tera pati aa to jaega par ye samajh le ek gurda na hoga, ya ek aankh na hogee, ya maan le …’ aurat rone lagee. pulis ne kaha ab yahaan thaane mein na ro. yahaan auraten rotee hain to log jaane kya kya samajhate hain. yahaan se to tujhe hansate hue jaana chaahie.’

ye to huee aadamee ke gum ho jaane kee baat. ab sunen kutte ke pillon kee gumashudagee kee daastaan. darasal jo kutte ke pille khoe hai unhen kutte ka pilla kahane se bhee dar raha hoon. usakee vajah hai. aapako maaloom hee hai ki kuchh saal pahale amerika ke raashtrapati jab apane dal bal ke saath dillee aae the to unake saath kutte bhee the. unake kutton kee pratishtha, garima, pad aadi ke baare mein pata na hone ke kaaran ek bhaarateey adhikaaree ne unhen kutta kah diya tha. isee baat par us adhikaaree ke khilaaph kutton kee maanahaani ka daava kar diya gaya tha. adaalat mein amerikee sarakaar ke pratinidhi ne kaha tha, ye kutte nahin hain – inake naam aur pad hain. ek ka naam jaik jonee hai aur vah mejar ke pad par hai. doosare ka naam steev sho hai jo kaipten hai. teesaree kutiya ka naam linda jons hai jisane abhee abhee jvain kiya hai aur vah sekend lephteenent hai. adaalat ne in adhikaariyon kee maanahaani karane ke silasile mein sambandhit adhikaaree ko saja sunaee thee aur yah aadesh diya tha ki bhavishy mein in kutton ko kutta nahin kaha jaega, yahee vajah rahee ki raajadhaanee ke samaachaarapatr bade aadar aur sammaan se kutton ke naam aur pad chhaapate rahe. aap ham sab jaanate hain ki vaise bhee hamaare samaachaarapatr kutton ka kitana dhyaan rakhate hain kyonki usase laabh haani judee hotee hai.

hua yah ki ek raat do baje mantreeputr ke ghar se thaane phon aaya. thaane kee neend ud gaee. mantreeputr ne daanta aur kaha ki tum sote rahate ho aur chor choree karate rahate hain. tumhen pata hai bebee ratan aur bebee gauree ka apaharan ho gaya hai. thaane mein turant kaaryavaahee kee baat uthee. par sab jaanate the ki mantreeputr abhee tak avivaahit hai aur usane kasam khaee huee hai ki jab tak svayan mantree nahin ban jaega shaadee nahin karega. aisee haalat mein bebee ratan aur bebee gauree kahaan se aa gae. is savaal ka javaab koee na de saka to havaalaat mein band ek aparaadhee ne diya. usane bataaya, bebee ratan aur bebee gauree maidam loosee aur sar jonasan kee aulaaden hain jinhen mantreeputr yoo.es. se khareed kar lae the aur anajaan tatha anaadee inhen kutte ke pille kah uthe the jis par usee samay unakee jubaan khinchava lee gaee thee.

ratan aur gauree ke apaharan kee khabar jangal kee aag kee tarah phail gaee. sthaaneey patrakaaron ke baad tee.vee. chainal vaale dhamak pade aur poora thaana kaimaron, laiton, kataron se bhar gaya. kuchh tee.vee.vaale mantreeputr kee kothee par pahunch gae. sabase pahale yah ‘breking nyooj’ ‘jalva chainal’ ne dee. usake baad yah breking nyooj ‘samakul chainal’ par shuroo huee. usake baad to ghamaasaan shuroo ho gaya. har chainal par breking nyooj storee chalane lagee, ratan aur gauree ke ‘stils’ aur ‘phutej’ kee maang itanee badh gaee ki prodakshan hausonvaale paagal ho gae.

chainalon mein toophaan mach gaya. ek riportar kee naukaree isalie chalee gaee ki vah ratan kee photo nahin la saka. doosare chainal mein kisee ka promoshan ho gaya ki vah mantreeputr kee ‘bait’ le aaya. ek patrakaar ko peeta gaya, kyonki usane mantreeputr ke kuttaaghar, jise angrejee mein sab ‘kenall’ kahate the, mein ghusane kee koshish kee thee. do pulisavaale saspend ho gae kyonki chaar ghante ho gae the aur unhonne ratan aur gauree ka pata nahin lagaaya tha. dee.em. ka traansaphar hote hote bacha aur es.pee. ko ‘kaaran batao’ notis de diya gaya.

chainalavaalon ne pulis ko pataane ka kaam shuroo kiya. ve chaahate the ki is poore opareshan mein jise pulis ne ‘aapareshan truth’ ka naam diya tha, ve lagaataar pulis ke saath rahen. ‘jalva’ chainalavaalonne pulis ko yah samajha kar pataaya ki ‘aapareshan truth’ ke baad chainal pulis ka intaravyoo dikhaega. yah baat ‘chainal phor phaiv siks’vaale ko pata chal gaee. unhonne pulis ko pachchees hajaar nakad dene ka vaayada kiya. kaha yah ki ‘jalva’vaalon kee jagah unhen poore ‘opareshan truth’ mein saath rakha jae. yah baat ‘moon chainal’vaalon ko pata chalee to unhonne grh mantraalay ke ek seeniyar opheesar se phon karaaya aur aadesh diya gaya ki pulis ‘moon chainal’vaalon ko praathamikata de. baat itane oopar pahunch chukee thee ki pulisavaale darane lage. dee.em. ko lagane laga ki kal kaheen pradhaanamantree sachivaalay se phon na aa jae.

pulis ne chhaape maarane shuroo kie. chaar teemen banaee gaeen aur raat din ratan aur gauree kee talaash ka kaam shuroo ho gaya. isee dauraan mantreeputr ke paas phon aaya ki phalaan phalaan jagah pachaas karod rupaya na pahunchaaya gaya to ratan aur gauree kee hatya kar dee jaegee. ab storee ka ek naya ‘aingil’ nikal aaya. chainal visheshagyon ko bula kar unase bahas karaane lage. sukhad yah raha ki chainalavaalon ko is masale mein visheshagy badalane nahin pade. do chaar aadamee jo raajaneeti, samaaj, vanaspatishaastr aur khagolashaastr ke visheshagy the aur har tarah ke kaaryakramon mein tee.vee. par aaya karate the vahee gauree aur ratanavaale maamale mein bhee aae aur darshak yah soch kar achambhe mein pad gae ki raajaneeti ke marmagy kutton ke baare mein bhee pooree jaanakaaree rakhate hain. chainalavaale garv se kahate the ki visheshagyata aur ‘propheshalanijm’ ke jamaane mein hamane aise log khoj rakhe hain jo sansaar kee kisee bhee samasya, gyaan vigyaan ke kisee bhee kshetr mein, lok paralok kee kisee bhee ghatana ke baare mein vidvattaapoorn dhang se vichaar vyakt kar sakate hain.

eeshvar ka karana kuchh aisa hua ki pulis, see.aaee.dee., aaee.bee., ro. aur doosaree khuphiya ejensiyon ne mil kar red daalane shuroo kie aur aakhirakaar pata chala ki ek jagah shahar ke baahar ek phaarm haus mein ratan aur gauree ko rakha gaya hai. apaharanakarta poore asalahe se lais hain. unake paas bophors topon se le kar ‘entee-eyarakraapht gan’ tak maujood hai. ab to sena se madad lene kee jaroorat padee. grh mantraalay ne suraksha mantraalay se nivedan kiya aur ek le. janaral ke saath briged bhej dee gaee.

tee.vee. chainalon par bahas ka mudda yah tha ki is ‘opareshan truth’ mein ratan aur gauree salaamat nikal aaenge ya nahin. yah bhee jaanakaaree milee ki apaharanakartaon ne maarket se do sau tan tee.en.tee. bhee khareedee hai aur usaka jakheera bhee unake paas hai. tee.vee. chainalon ke vahee visheshagy jo vanaspati vigyaan se le kar suparasonik jeton tak ke visheshagy the kahane lage itana ‘eksaplosiv maiteeriyal’ to poore phaarm haus ko jvaalaamukhee kee tarah uda dega aur jaahir hai usamen nanhe munne ratan aur gauree ke bachane kee kya ummeed hogee. tab kaha gaya ki yah darasal manovaigyaanik ladaee hai. ise bhaarat akele nahin lad sakata. isamen to jab tak amerika ka saport nahin hoga yah ladaee nahin jeetee ja sakatee. amerika se kaha gaya to vahaan se bada saarthak aur utsaahavardhak javaab aaya. amerika ne kaha ki vah to sansaar ke har kone mein shaanti sthaapit karane ke lie drdhasankalp hai. jahaan bhee shaanti bhang hone, maanav adhikaaron ke hanan ka savaal uthata hai amerika uth khada hota hai. aur ab choonki bhaarat mein aisee sthiti aa gaee hai isalie amerika avashy hee aaega.

yah bhaarat kee sabhyata hai ki vah amerika ko aamantrit kar raha hai. yadi na bhee kar raha hota to bhee amerika aata kyonki vah vishv mein shaanti sthaapit karana chaahata hai aur yah usake ‘ejende’ ka ek aur pahala mudda hai. yahee nahin, amerika ne ghoshana kar dee ki usakee senaen dhvani se tej chalanevaale vimaanon par baith kar bhaarat ke lie ravaana ho chukee hain. hind mahaasaagar mein amerikee bedon ko bhaarat kee taraph kooch karane ka aadesh de diya gaya hai. aur yah bhee kaha gaya ki bhaarat ko chaahie ki senaon ke pahunchane se pahale kokaakola aur pepseekola ka paryaapt bhandaar kar le. maikdaanaald haimabargar, ankil chips, kanatakee chikan, eph.tee.je. vagaira kee jitanee jyaada dukaanen kholee ja sakatee hon khulava de kyonki amerikee sainik jaahir hai daal rotee nahin khaenge. choonki yah aadesh tha isalie intijaam poora ho gaya. bade bade amerikee baajaar khul gae jahaan suee se le kar havaee jahaaj tak upalabdh tha.

aisee taiyaaree ka nateeja bhee achchha nikala. lejar bam se ratan aur gauree ke ek apaharanakarta ko maar giraaya gaya. doosara ek tahakhaane mein chhip gaya tha. usane daadhee badha lee thee, use pakada gaya. amerikee sainikon ne kaha ki ham ise amerika le jaenge aur chidiyaaghar mein band kar denge taaki vishv shaanti bhang karanevaalon ke lie ek sabak ho.

choonki amerikee sainikon ke lie pepsee, kola, biyar, haimabargar aadi ka bada staak tha isalie unhen vaapas jaane kee jaldee nahin thee. unhonne kaha ki ham to aapake desh se vishvashaanti bhang karanevaalee sabhee shaktiyon ko nasht karake hee jaenge. unake is vichaar ka svaagat kiya gaya aur ve yahaan pepsee pee pee kar mote hone lage.

jis din thaane mein ratan aur gauree pahunche usee din vahaan ek sirakatee laash bhee pahunchee. ratan aur gauree ke mil jaane kee vajah se thaane ke chaaron taraph dapha 104 laga diya gaya tha, kyonki o.vee. vainon se raasta band ho gaya tha aur darshakon ka sailaab tha jo amerikee sainikon aur ratan gauree ko dekhane ke lie umad pada tha. kaee baar laathee chaarj ho chuka tha par darshak kaaboo mein nahin aa rahe the. ve jayajayakaar kar rahe the. khushee ke maare aape se baahar hue ja rahe the.

isee beech mailee kuchailee dhotee baandhe, teen bachchon ko sanbhaale kisee tarah giratee padatee ek aurat thaane pahunchee. use pata lag gaya tha ki aaj ek sirakatee laash thaane laee gaee hai. kisee na kisee tarah yah aurat thaane ke andar aa gaee. vahaan teevee chainalavaale bhare pade the aur amerikee sainikon ke saath sigareten pee rahe the. ekaadh beeyar kee ghoont bhee mil jaatee thee.

tee.bee.see. chainal kee raadhika raman ne dekha ki ek aurat sirakatee laash ke paas khadee use pahachaanane kee koshish kar rahee hai. usake saath teen chhote chhote bachche bhee khade hain. raadhika ne apne bos satyakaam se kaha – ‘sar, ye dekhie kitanee achchhee storee hai. sirakatee laash ko yah aurat pahachaanane kee koshish kar rahee hai. teen bachche paas khade hain. ise shoot karen sar?’

satyakaam bigad kar bola – ‘kya chaahatee ho chainal band ho jae.’

‘nahin sar… lekin kyon?’ raadhika ne kaha.

satyakaam bole – ‘is aurat, bachchon aur laash ka ‘vijual’ dekh kar see.ee.o. mistar mehara meree to chhuttee kar denge.’

‘kyon sar?’

satyakaam bole – ‘o maee god… tumhen ye bhee bataana padega? are hamaare chainal par ‘aid’ aate hain, vigyaapan samajheen?’

‘haan sar.’

vo vigyaapan kisake lie hote hain? kaun vah saamaan khareedata hai? vah kya dekhana… ‘chalo chalo kaimara lagao… riphlektar… saund…’ chainal ka sanvaadadaata chillaane laga kyonki thaane ke andar bade khoobasoorat manch par ratan aur gauree ko laaya ja raha tha. unake peechhe peechhe mantreeputr, kamal ka phool bana, aa raha tha. peechhe adhikaaree, sena ke padaadhikaaree aadi the. sangeet baj raha tha. kabootar aur gubbaare hava mein chhode ja rahe the. aatishabaajee aasamaan par rangabirange karishme dikha rahee thee. pooree imaarat jagamaga rahee thee. lagata tha aaj chhabbees janavaree ya pandrah agast hai. chaaron taraph ullaas, mastee, vijay ka bhavy pradarshan vyaapt tha.

us aurat ne sirakatee laash pahachaan lee thee. yah usaka pati hee tha, aurat ro rahee thee, par mauj, mastee, aanand, ullaas, jashn, geet, sangeet ke maahaul mein usakee aavaaj koee nahin sun raha tha.

usake bachche apane phate puraane kapadon mein sahame, sikude, munh khole manch par honevaale tamaashe mein doobe hue the. ve na apanee maan ko dekh rahe the, na baap kee sirakatee laash ko.

Add Comment

By: Asghar Wajahat

© 2021 Pothi | All Rights Reserved

Do not copy, Please support by sharing!