jahaan rang-o-boo hai aur main hoon
bahaar-e-aarazoo hai aur main hoon
sukoon ka kaam kya is may-kade mein
azal se ha-o-hoo hai aur main hoon
ilaahee shar mein rakkha hee kya hai
namaaz-e-be-vazoo hai aur main hoon
jo tum aae to aaee jaan mein jaan
muqaddar roo-ba-roo hai aur main hoon
miree rusvaiyaan hain aur tum ho
tumhaaree guftugoo hai aur main hoon
tire deedaar kee jooya hain aankhen
talaash-e-chaar-soo hai aur main hoon
ajab shay khud-faraamoshee hai kaifi
suraahee hai suboo hai aur main hoon