loader image

dole ka geet – a poem by Dharamveer Bharti

agar dola kabhee is raah se gujare kuvela,
yahaan ambava tare ruk
ek pal vishraam lena,
milo jab gaanv bhar se baat kahana, baat sunana
bhool kar mera
na haragij naam lena

agar koee sakhee kuchh jikr mera chhed baithe,
hansee mein taal dena baat,
aansoo thaam lena

shaam beete, door jab bhatakee huee gaayen rambhaen
neend mein kho jaaye jab
khaamosh daalee aam kee,
tadapatee pagadandiyon se poochhana mera pata,
tumako bataengee katha meree
vyatha har shaam kee

par na apana man dukhaana, moh kya usaka
kee jisaka neh chhoota, geh chhoota
har nagar paradesh hai jisake lie,
har dagariya raam kee

bhor phoote bhaabhiyaan jab god bhar aasheesh de de,
le vida amaraiyon se
chal pade dola humach kar,
hai kasam tumako,
tumhaare kompalon se nain mein aansoo na aaye
raah mein paakad tale
sunasaan pa kar

preet hee sab kuchh nahin hai,
lok kee marajaad hai sabase badee
bolana rundhate gale se
le chalo jaldee chalo pee ke nagar

pee milen jab,
phool see angulee daba kar chutakiyaan len aur poochhe
kyon
kaho kaisee rahee jee yah safar kee raat?
hans kar taal jaana baat, hans kar taal jaana baat, aansoo thaam lena
yahaan ambava tare ruk ek pal vishraam lena,
agar dola kabhee is raah se gujare

dole ka geet

786

Add Comment

By: Dharamveer Bharti

© 2021 Pothi | All Rights Reserved

Do not copy, Please support by sharing!