loader image

toota pahiya – a poem by Dharamveer Bharti

main
rath ka toota hua pahiya hoon
lekin mujhe phenko mat !

kya jaane kab
is durooh chakravyooh mein
akshauhinee senaon ko chunautee deta hua
koee dussaahasee abhimanyu aakar ghir jaay !

apane paksh ko asaty jaanate hue bhee
bade-bade mahaarathee
akelee nihatthee aavaaz ko
apane brahmaastron se kuchal dena chaahen
tab main
rath ka toota hua pahiya
usake haathon mein
brahmaastron se loha le sakata hoon !
main rath ka toota pahiya hoon

lekin mujhe phenko mat
itihaason kee saamoohik gati
sahasa jhoothee pad jaane par
kya jaane
sachchaee toote hue pahiyon ka aashray le !

626

Add Comment

By: Dharamveer Bharti

© 2022 Pothi | All Rights Reserved

Do not copy, Please support by sharing!