loader image

shaam – do manahsthitiyaan – a poem by Dharamveer Bharti

ek:

shaam hai, main udaas hoon shaayad
ajanabee log abhee kuchh aayen
dekhie anachhue hue samput
kaun motee sahejakar laayen
kaun jaane ki lautatee bela
kaun-se taar kahaan chhoo jaayen!

baat kuchh aur chhedie tab tak
ho dava taaki bekalee kee bhee
dvaar kuchh band, kuchh khula rakhie
taaki aahat mile galee kee bhee!

dekhie aaj kaun aata hai
kaun-see baat nayee kah jaaye
ya ki baahar se laut jaata hai
deharee par nishaan rah jaaye
dekhie ye lahar duboye, ya
sirf tatarekh chhoo ke bah jaaye!

kool par kuchh pravaal chhoot jaayen
ya lahar sirf phenavaalee ho
adhakhile phool-see vinat anjulee
kaun jaane ki sirf khaalee ho?

do:

vaqt ab beet gaya baadal bhee
kya udaas rang le aaye
dekhie kuchh huee hai aahat-see
kaun hai? tum? chalo bhale aaye!

ajanabee laut chuke dvaare se
dard phir lautakar chale aaye
kya ajab hai pukaarie jitana
ajanabee kaun bhala aata hai
ek hai dard vahee apana hai
laut har baar chala aata hai!

anakhile geet sab usee ke hain
anakahee baat bhee usee kee hai
anuge din sab usee ke hain
anahuee raat bhee usee kee hai
jeet pahale-pahal milee thee jo
aakhiree maat bhee usee kee hai!

ek-sa svaad chhod jaatee hai
zindagee trpt bhee va pyaasee bhee
log aaye gaye baraabar hain
shaam gahara gayee, udaasee bhee!

785

Add Comment

By: Dharamveer Bharti

© 2022 Pothi | All Rights Reserved

Do not copy, Please support by sharing!