loader image

tumhaare charan – a poem by Dharamveer Bharti

ye sharad ke chaand-se ujale dhule-se paanv,
meree god mein !
ye lahar par naachate taaze kamal kee chhaanv,
meree god mein !
do bade maasoom baadal, devataon se lagaate daanv,
meree god mein !

rasamasaatee dhoop ka dhalata pahar,
ye havaen shaam kee, jhuk-jhoomakar barasa gaeen
roshanee ke phool harasingaar-se,
pyaar ghaayal saanp-sa leta lahar,
archana kee dhoop-see tum god mein lahara gaeen
jyon jhare kesar titaliyon ke paron kee maar se,
sonajoohee kee pankhuriyon se gunthe, ye do madan ke baan,
meree god mein !
ho gaye behosh do naajuk, mrdul toofaan,
meree god mein !

jyon pranay kee loriyon kee baanh mein,
jhilamilaakar au’ jalaakar tan, shamaen do,
ab shalabh kee god mein aaraam se soyee hueen
ya farishton ke paron kee chhaanh mein
dubakee huee, sahamee huee, hon poornimaen do,
devataon ke nayan ke ashru se dhoee hueen .
chumbanon kee paankhuree ke do javaan gulaab,
meree god mein !
saat rangon kee mahaavar se rache mahataab,
meree god mein !

ye bade sukumaar, inase pyaar kya ?
ye mahaj aaraadhana ke vaaste,
jis tarah bhatakee subah ko raaste
haradam bataaye hain rupahare shukr ke nabh-phool ne,
ye charan mujhako na den apanee dishaen bhoolane !
ye khandaharon mein sisakate, svarg ke do gaan, meree god mein !
rashmi-pankhon par abhee utare hue varadaan, meree god mein !

tumhaare charan

876

Add Comment

By: Dharamveer Bharti

© 2022 Pothi | All Rights Reserved

Do not copy, Please support by sharing!