loader image

niraala ke prati – a poem by Dharamveer Bharti

vah hai kaare-kajaraare meghon ka svaamee
aisa hua ki
yug kee kaalee chattaanon par
paanv jamaakar
vaksh taanakar
sheesh ghumaakar
usane dekha
neeche dharatee ka zarra-zarra pyaasa hai,
kaee peedhiyaan
boond-boond ko taras-taras dam tod chukee hain,
jinakee ek-ek haddee ke peechhe
sau-sau kaale andhad
bhookhe kutton se aapas mein guthe ja rahe.
pyaase mar jaanevaalon kee
laashon kee dheree ke neeche kitane anajaane
anadekhe
sapane
jo na geet ban pae
ghut-ghut kar mitate jaate hain.
koee anajanmee duniya hai
jo in laashon kee dheree ko
ulat-pulat kar
ubhar-ubhar ubhar aane ko machal rahee hai!
vah tha kaare-kajaraare meghon ka svaamee
usake maathe se kaanon tak
pratibha ke matavaale baadal laharaate the
meghon kee veena ka gaayak
dheer gambheer svaron mein bola—
‘jhoom-jhoom mrdu garaj garaj ghanaghor
raag amar ambar mein bhar nij ror.’
aur usee ke hothon se
ud chaleen geet kee shyaam ghataen
paankhen khole
jaise shyaamal hanson kee paaten laharaen!
kaee yugon ke baad aaj phir kavi ne meghon ko apana sandesh diya tha
lekin kisee yaksh virahee ka
yah karuna-sandesh nahin tha
yug badala tha
aur aaj nav meghadoot ko
yug-parivartak kavi ne
viplav ka gurutar aadesh diya tha!
bola vah…
har jaladhaara kalyaanee ganga ban jae
amrt banakar pyaasee dharatee ko jeevan de
au’ laashon ka dher bahaakar
us anajanmee duniya ko oopar le aae
jo andar hee andar
gahare andhiyaare se joojh rahee hai.
aur ud chale ve viplav ke vishadhar baadal
jinake praanon mein thee chhipee huee
amrt kee ganga.
beet gae din varsh maas…
bahut dinon par
ek baar phir
sahasa us meghon ke svaamee ne yah dekha…
ve viplav ke kaale baadal
ek-ek kar bin barase hee laut rahe hain
jaise thakakar
saandhy vihag ghar vaapas aaen.
chattaanon par paanv jamaakar
vaksh taanakar usane poochha…
‘jhoom jhoomakar
garaj garajakar
baras chuke tum?’
aparaadhee meghon ne neeche nayan kar lie
aur kaanpakar ve yah bole…
‘viplav kee pralayankar dhaara
kaalakoot vish
sahan kar sake jo
dharatee par aisa mila na koee maatha!
viplav ke praanon mein chhipee huee
amrt kee ganga ko
dhaaran kar lene vaalee
milee na koee aisee pratibha
iseelie ham nabh ke kone-kone mein
ab tak mandarae
lekin bebas
phir bin barase vaapas aae.
o ham kaare-kajaraare meghon ke svaamee
tumheen bata do
kaun bane is yug ka shankar
jo ki garal hans kar pee jae
aur jataen khol
amrt kee ganga ko bhee dhaaran kar le!’
utha niraala, un kaale meghon ka svaamee
bola…. ‘koee baat nahin hai
bade badon ne haar diya hai kandha yadi to
mere hee in kandhon par ab
utaregee is yug kee ganga
meree hee is pratibha ko hansakar kaalakoot bhee peena hoga.’
aur nae yug ka shiv banakar
usane apana seena taan jataen kholeen.
ek-ek kar ve kaale zahareele baadal
utar gae usake maathepar
aur nayan mein chhalak uthee amrt kee ganga.
aur is tarah poorn hua yah nae dhang ka gangaavataran.
aur aaj vah kajaraare meghon ka svaamee
jahar sambhaale, amrt chhipae
is vyaakul pyaasee dharatee par
paagal jaisa dol raha hai,
aane vaale svarnayugon ko
amrtakanon se seenchega vah
har vidrohee qadam
naee duniya kee pagadandee par likh dega,
har alabela geet
mukhar svar ban jaega
us bhavishy ka
jo ki andhere kee paraton mein abhee mook hai.
lekin yug ne usako abhee nahin samajha hai
vah avadhooton jaisa phirata paagal-nanga
praanon mein toofaan , palak mein amrit-ganga.
pratibha mein sukumaar-sajal ghanashyaam ghataen
jinake meghon ka gambheer arthamay garjan
hai kabhee phoot padata asphut vaanee mein
jisako samajh nahin paate ham
to kah dete hain
yah hai keval paagalapan
kahate hain chaitany mahaaprabhu mein, saramad mein
eesa mein bhee
kuchh aisa hee paagalapan tha
ulat diya tha jisane apane yug ka takhta.

niraala ke prati

699

Add Comment

By: Dharamveer Bharti

© 2022 Pothi | All Rights Reserved

Do not copy, Please support by sharing!