door desh mein kisee videshee gagan khand ke neeche
soye hoge tum kiranon ke teeron kee shaiyya par
maanavata ke tarun rakt se likha sandesha paakar
mrtyu devataon ne honge praan tumhaare kheenche
praan tumhaare dhoomaketu se cheer gagan pat jheena
jis din pahunche honge devalok kee seemaon par
amar ho gaee hogee aasan se maut moorchchhita hokar
aur phat gaya hoga eeshvar ke maraghat ka seena
aur devataon ne le kar dhruv taaron kee tek –
chhidake honge tum par tarunaee ke khoonee phool
khud eeshvar ne cheer angootha apanee satta bhool
uth kar svayan kiya hoga vidrohee ka abhishek
kintu svarg se asantusht tum, yah svaagat ka shor
dheeme-dheeme jabaki pad gaya hoga bilakul shaant
aur rah gaya hoga jab vah svarg desh
khol kafan taaka hoga tumane bhaarat ka bhor.