hath kar baitha chaand ek din, maata se yah bola,
‘‘silava do maan mujhe oon ka mota ek jhingola.
sansan chalatee hava raat bhar, jaade se marata hoon,
thithur-thithurakar kisee tarah yaatra pooree karata hoon.
aasamaan ka saphar aur yah mausam hai jaade ka,
na ho agar to la do kurta hee koee bhaade ka.’’
bachche kee sun baat kaha maata ne, ‘‘are salone!
kushal karen bhagavaan, lagen mat tujhako jaadoo-tone.
jaade kee to baat theek hai, par main to dartee hoon,
ek naap mein kabhee nahin tujhako dekha karatee hoon.
kabhee ek angul bhar chauda, kabhee ek phut mota,
bada kisee din ho jaata hai, aur kisee din chhota.
ghatata-badhata roj kisee din aisa bhee karta hai,
nahin kisee kee bhee aankhon ko dikhalaee padata hai.
ab too hee ye bata, naap tera kis roz livaen,
see den ek jhingola jo har roj badan mein aae?’’
