lahoo-luhaan nazaaron ka zikr aaya to
shareef log uthe door ja ke baith gae
main jise odhata bichhaata hoon
vo gazal aap ko sunaata hoon
nazar-navaaz nazaara badal na jae kaheen
zara see baat hai munh se nikal na jae kaheen
vo aadamee nahin hai mukammal bayaan hai
maathe pe us ke chot ka gahara nishaan hai
na ho qameez to paanv se pet dhak lenge
ye log kitane munaasib hain is safar ke lie
ab to is taalaab ka paanee badal do
ye kanval ke phool kumhalaane lage hain
ye soch kar ki darakhton mein chhaanv hotee hai
yahaan babool ke sae mein aa ke baith gae
ek qabristaan mein ghar mil raha hai
jis mein tah-khaanon se tah-khaane lage hain
ye log homo-havan mein yaqeen rakhate hain
chalo yahaan se chalen haath jal na jae kaheen
maslahat-aamez hote hain siyaasat ke qadam
too na samajhega siyaasat too abhee naadaan hai