svapn ke bheetar svapn,
vichaaradhaara ke bheetar aur
ek any
saghan vichaaradhaara prachchhan!!
kathy ke bheetar ek anurodhee
viruddh vipareet,
nepathy sangeet!!
mastishk ke bheetar ek mastishk
usake bhee andar ek aur kaksh
kaksh ke bheetar
ek gupt prakoshth aur
kothe ke saanvale guhaandhakaar mein
majaboot…sandooq
drdh, bhaaree-bharakam
aur us sandooq bheetar koee band hai
yaksh
ya ki oraangutaang haay
are! dar yah hai…
na oraang…utaang kaheen chhoot jaay,
kaheen pratyaksh na yaksh ho.
qareene se saje hue sanskrt…prabhaamay
adhyayan-grh mein
bahas uth khadee jab hotee hai–
vivaad mein hissa leta hua main
sunata hoon dhyaan se
apane hee shabdon ka naad, pravaah aur
paata hoon aksamaat
svayan ke svar mein
oraangutaang kee baukhalaatee hunkrti dhvaniyaan
ekaek bhayabheet
paata hoon paseene se sinchit
apana yah nagn man!
haay-haay aur na jaan le
ki nagn aur vidroop
asaty shakti ka pratiroop
praakrt auraang…utaang yah
mujhamen chhipa hua hai.
svayam kee greeva par
pherata hoon haath ki
karata hoon mahasoos
ekaek garadan par ugee huee
saghan ayaal aur
shabdon par uge hue baal tatha
vaakyon mein oraang…utaang ke
badhe hue naakhoon!!
deekhatee hai sahasa
apanee hee guchchhedaar moonchh
jo ki banatee hai kavita
apane hee bade-bade daant
jo ki banate hai tark aur
deekhata hai pratyaksh
bauna yah bhaal aur
jhuka hua maatha
jaata hoon chaunk main nij se
apanee hee baaladaar saj se
kapaal kee dhaj se.
aur, main vidroop vedana se grast ho
karata hoon dhad se band
vah sandooq
karata hoon mahasoos
haath mein pistaul bandooq!!
agar kaheen petee vah khul jae,
oraangutaang yadi usamen se uth pade,
dhaany dhaany golee daagee jaegee.
raktaal…phaila hua sab or
oraangutaang ka laal-laal
khoon, tatkaal…
taala laga deta hoon mein petee ka
band hai sandooq!!
ab is prakoshth ke baahas aa
anek kamaron ko paar karata hua
sanskrt prabhaamay adhyayan-grh mein
adrshy roop se pravesh kar
chalee huee bahas mein bhaag le raha hoon!!
sochata hoon–vivaad mein grast kaeen log
kaee tal
saty ke bahaane
svayan ko chaahate hai prasthaapit karana.
ahan ko, tathy ke bahaane.
meree jeebh ekaek taal se chipakatee
akl kshaarayukt-see hotee hai
aur meree aankhen un bahas karanevaalon ke
kapadon mein chhipee huee
saghan rahasyamay lambee poonchh dekhatee!!
aur main sochata hoon…
kaise saty hain–
dhaank rakhana chaahate hain bade-bade
naakhoon!!
kisake lie hain ve baaghanakh!!
kaun abhaaga vah!!