suneeta varma-
is naam ko main
doharaata hoon mann hee mann
aur bhar jaata hoon khushee se-
mere hee shahar mein rahatee hai
jo rangon ko chhedakar
rangon se khelakar
chitr hee nahin banaatee
balki rangon se jeevan rachatee hai
rachatee hai jeevan ka saundary
saundary ka jeevan
jeevan mein saundary
saundary mein jeevan
kalpana karata hoon main
kaagaj aur kainavaas par
saarthak, sajeev, aur jeevant upasthiti ke liye apanee
kitanee bechainee se tahalate honge rang
usake man mein, mastishk mein
koonchiyon ka bhee hota hoga
lagabhag yahee haal
unakee naajuk aur mulaayam ungaliyon ke sahaare
rangon mein doobakar
thirakane, phudakane, naachane kee chaah mein
rangon kee baarish mein
bheegee huee ek kalaakaar
doobee huee unakee gaharaeeyon mein
unake svabhaav ke anusaar
apanee tamaam khaamoshiyon
aur ekaagrata ke saath
unase bolatee batiyaatee
unakee apanee bhaasha mein
is samay bhee bheegee huee hai vah
jabaki aaee hai mujhase milane
chhodakar apane kala kaksh mein
rangon ka samudr
jisakee chanchal laharen
pukaar rahee hain use lagaataar
main poochhata hoon
aur chahak uthatee hai vah-
har rang ka apana svabhaav hota hai
jaise har manushy kee apanee aadaten
jaise ‘rason’ ke apane gun
har rang ka svaad bhee hota hai apana
jise kam se kam jeebh se chakhakar
jaan paana mushkil hai
sukhad aashchary se bhar jaata hoon main
ki unhen dekhakar
unase milakar
unase baatacheet kar
jaan paana bahut mushkil hai
ki ve chitrakaar hain
kyonki jin rangon mein ulajhee rahatee hain
bheegee rahatee hain jin rangon kee baarish se
un rangon ke chheente
dikhaee hee nahin dete
unake poore vyaktitv ke
kisee bhee hisse mein
bahut der tak bach paana
bahut mushkil hai
unake vyaktitv kee shaaleenata
pahanaave kee saadagee
baaton kee mithaas
sangeetamay hansee kee khanak
aur unakee do khoobasoorat
nirdosh aur samajhadaar
kuchh talaashatee see
bechain aankhon ke prabhaav se
jinamen rang tair rahe hain ya svapn
yah bhee kah paana mushkil hai
is chhotee see mulaakaat mein
kahata hoon main apane aap se
iseelie to suneeta varma hai vah-
rangon ke sammohan
aur tilasm mein pravesh kar
use todatee hai
aur phir rachatee hai unheen se
ek tilasm, ek sammohan
bilkul vaisa hee!
unake rache hue ped sirph ped nahin hote
unake khilaaye hue phool sirph phool
banaayee huee chidiya sirph chidiya nahin hotee
naachate hue log sirph log
unake dvaara kholee gaee khidakee sirph khidakee nahin hotee
khidakee ke paar hota hai poora jeevan
hota hai jeevan aur saundary ka viraat sansaar
hotee hain ummeeden,
svapn, ichchhaayen
yathaarth ke achchhe bure anubhav aur drishy
haan haan yahee to jaadoo hai unaka
ki unake haath lagaane ke baad
ped aur phool, bhool jaate hain murajhaana
chidiya udana, khidakee band hona
aur naachate hue log vishraam karana
baharahaal
hamen prem aur samarpan us tarah karana chaahie
jis tarah suneeta verma
jis prakaar rang bikhare hote hain
unake chaaron or
jis tarah bikharee hotee hain ve
rangon ke ird-gird
prem aur samarpan mein hamen
kuchh usee tarah bikharana chaahie.
Closeclose