hamaaree jindagee ke din,
bade sangharsh ke din hain.
hamesha kaam karate hain,
magar kam daam milate hain.
pratikshan ham bure shaasan–
bure shoshan se pisate hain!!
apadh, agyaan, adhikaaron se
vanchit ham kalapate hain.
sadak par khoob chalate
pair ke joote-se ghisate hain..
hamaaree jindagee ke din,
hamaaree glaani ke din hain!!
hamaaree jindagee ke din,
bade sangharsh ke din hain!
na daana ek milata hai,
khalaaye pet phirate hain.
munaaphaakhor kee godaam
ke taale na khulate hain..
vikal, behaal, bhookhe ham
tadapate au tarasate hain.
hamaare pet ka daana
hamen inakaar karate hain..
hamaaree jindagee ke din,
hamaaree bhookh ke din hain!!
hamaaree jindagee ke din,
bade sangharsh ke din hain!
nahin milata kaheen kapada,
langotee ham pahanate hain.
hamaaree auraton ke tan
ughaare hee jhalakate hain..
hajaaron aadamee ke shav
kaphan tak ko tarasate hain.
bina odhe hue chadara,
khule maraghat ko chalate hain..
hamaaree jindagee ke din,
hamaaree laaj ke din hain!!
hamaaree jindagee ke din,
bade sangharsh ke din hain!
hamaare desh mein ab bhee,
videshee ghaat karate hain.
bade raaje, mahaaraaje,
hamen mohataaj karate hain..
hamen insaan ke badale,
adham sookar samajhate hain.
gale mein daalakar rassee
kutil kaanoon kasate hain..
hamaaree jindagee ke din,
hamaaree kaid ke din hain!!
hamaaree jindagee ke din,
bade sangharsh ke din hain!
iraada kar chuke hain ham,
pratigya aaj karate hain.
himaalay aur saagar mein,
naya toophaan rachate hain..
gulaamee ko masal denge
na hatyaaron se darate hain.
hamen aajaad jeena hai
isee se aaj marate hain..
hamaaree jindagee ke din,
hamaare hosh ke din hain!!