bikhar gaya pankhuree-sa din,
phool gaee semal-see raat
poorab mein ankuraaya chaand,
jaag gaee sapanon kee maand
aa dhamaka kamare ke beech,
andhiyaara khidakee ko phaand,
othon par aa baitha maun,
band huee sooraj kee baat
abhilaasha dhoondh rahee thaanv,
aansoo ke phisal gae paanv
palakon par aa baithee oongh,
baragad mein ulajh gaya kaanv
nindiya ke ghar aaee aaj,
taaron kee jhilamil baaraat
phunagee par baith gaya chhand,
kaliyon ke dvaar hue band
pachhuva ke haathon ko thaam,
dol raha paagal makarand
simat gaee nimiya kee deh,
sihar gaya peepal ka paat.