loader image

puraana petikot – a poem by Shail Chaturvedi

paise bachaane kee aadat
achchhee hai dear
kintu jab tum
puraanee sari ko phaadakar
seetee ho mera underwear
to tumhaara idea
bahut bura lagata hai
phir bhee pahan leta hoon
ghisee sari ki ve chaddiyaan
jo do chaar baar uthane baithane par hee
bol jaatee hai
tis tum kahatee ho-
“bachche nahin ho
ghar chalaana seekho
bhavishy ke liye bachaana seekho.”

underwear tak to bachat theek hai
kintu us din
padosan kaakee ko tumane
apanee naee yojana sunaee
to qasam se
us raat neend nahin aaee
tum kah rahee thee-“kaakee,
gehoon teen rupaye ka
ek kilo bikata hai
aur chaaval!
svapn mein bhee kahaan dikhata hai
sochatee hoon
inaka ek kurta
reshamee sari se nikaal doon
kinaaree vaala hissa
aasteen aur gale par daal doon

sari mein se ek kya do kurte nikal aaenge
sari chal chukee hai das saal
kurte bhee kuchh saal chal jaenge.”
to he kapado kee engineer
apanee pyaaree sari ko
mat karana tear
sach kahata hoon
tumhaaree kala ke pradarshan ka maadhyam
main banoon
isakee chaah nahin
kya bachat karane kee
koee aur raah nahin?
he, suno!
puraana petikot
jo tum kamar me baandhatee ho
main gale mein baandh loonga
saara tan
usee se dhaank loonga
kharch bach jaayega
kurte aur pajaame ka
aur fashion nikal aayega
ek naye jaame ka.

593

Add Comment

By: Shail Chaturvedi

© 2021 Pothi | All Rights Reserved

Do not copy, Please support by sharing!