main badha hee ja raha hoon, par tumhen bhoola nahin hoon.
chal raha hoon, kyonki chalane se thakaavat door hotee,
jal raha hoon kyonki jalane se timisra choor hotee,
gal raha hoon kyonki halka bojh ho jaata hrday ka,
dhal raha hoon kyonki dhalakar saath pa jaata samay ka.
chaahata to tha ki ruk loon paarshv mein kshan-bhar tumhaare
kintu aganit svar bulaate hain mujhe baanhe pasaare,
anasunee karana unhen bhaaree pravanchan kaapurushata
munh dikhaane yogy rakkhegee na mujhako svaarthaparata.
isalie hee aaj yug kee dehalee ko laangh kar main-
path naya apana raha hoon
par tumhen bhoola nahin hoon.
gyaat hai kab tak tikegee yah ghadee bhee sankraman kee
aur jeevan mein amar hai bhookh tan kee, bhookh man kee
vishv-vyaapak-vedana keval kahaanee hee nahin hai
ek jalata saty keval aankh ka paanee nahin hai.
shaanti kaisee, chha rahee vaataavaran mein jab udaasee
trpti kaisee, ro rahee saaree dhara hee aaj pyaasee
dhyaan tak vishraam ka path par mahaan anarth hoga
rn na yug ka de saka to janm lena vyarth hoga.
isalie hee aaj yug kee aag apane raag mein bhar-
geet nootan ga raha hoon
par tumhen bhoola nahin hoon.
sochata hoon aadikavi kya de gaye hain hamen thaatee
kraunchinee kee vedana se phat gaee thee haay chhaatee
jabaki pakshee kee vyatha se aadikavi ka vyathit antar
prerana kaise na de kavi ko manuj kankaal jarjar.
any maanav aur kavi mein hai bada koee na antar
maatr mukharit kar sake, man kee vyatha, anubhooti ke svar
vedana asahaay hrdayon mein umadatee jo nirantar
kavi na yadi kah de use to vyarth vaanee ka mila var
isalie hee mook hrdayon mein ghumadatee vivashata ko-
main sunaata ja raha hoon
par tumhen bhoola nahin hoon.
aaj shoshak-shoshiton mein ho gaya jag ka vibhaajan
asthiyon kee neenv par akada khada praasaad ka tan
dhaatu ke kuchh theekaron par maanavee-sangya-visarjan
mol kankad-pattharon ke bik raha hai manuj-jeevan.
ek hee beetee kahaanee jo yugon se kah rahe hain
vajr kee chhaatee banae, sah rahe hain, rah rahe hain
asthi-majja se jagat ke sukh-sadan gadhate rahe jo
teekshnatar asidhaar par hansate hue badhate rahe jo
ashru se un dhooli-dhoosar shool jarjar kshat pagon ko-
main bhigota ja raha hoon
par tumhen bhoola nahin hoon.
aaj jo main is tarah aavesh mein hoon anamana hoon
yah na samajho main kisee ke rakt ka pyaasa bana hoon
saty kahata hoon parae pair ka kaanta kasakata
bhool se cheentee kaheen dab jaay to bhee haay karata
par jinhonne svaarthavash jeevan vishaakt bana diya hai
koti-koti bubhukshiton ka kaur talak chhina liya hai
laabh shubh likh kar zamaane ka hrday choosa jinhonne
aur kal bangaalavaalee laash par thooka jinhonne.
bilakhate shishu kee vyatha par drshti tak jinane na pheree
yadi kshama kar doon unhen dhikkaar maan kee kokh meree
chaahata hoon dhvans kar dena vishamata kee kahaanee
ho sulabh sabako jagat mein vastr, bhojan, ann, paanee.
nav bhavan nirmaanahit main jarjarit praacheenata ka-
gadh dhahaata ja raha hoon.
par tumhen bhoola nahin hoon.