loader image

kuchh soochanaen – a poem by Dhumil

sabase adhik hatyaen
samanvayavaadiyon ne kee.
daarshanikon ne
sabase adhik zevar khareeda.
bheed ne kal bahut peeta
us aadamee ko
jis ka mukh eesa se milata tha.

vah koee aur maheena tha.
jab pratyek tahanee par phool khilata tha,
kintu is baar to
mausam bina barase hee chala gaya
na kaheen ghata ghiree
na boond giree
phir bhee logon mein tee.bee. ke keetaanu
kaee pratishat badh gae

kaee baukhalae hue mendhak
kuen kee kaee lagee deevaal par
chadh gae,
aur sooraj ko dhikkaarane lage
–vyarth hee prakaash kee badaee mein bakata hai
sooraj kitana majaboor hai
ki har cheez par ek sa chamakata hai.

hava budabudaatee hai
baat kaee parton se aatee hai—
ek bahut baareek peela keeda
aakaash chhoo raha tha,
aur yuvak meethe julaab kee goliyaan kha kar
shauchaalayon ke saamane
panktibaddh khade hain.

aankhon mein jyoti ke bachche mar gae hain
log khoee huee aavaazon mein
ek doosare kee sehat poochhate hain
aur behad dar gae hain.

sab ke sab
roshanee kee aanch se
kuchh aise bachate hain
ki sooraj ko paanee se
rachate hain.

buddh kee aankh se khoon choo raha tha
nagar ke mukhy chauraste par
shokaprastaav paarit hue,
hijado ne bhaashan die
ling-bodh par,
veshyaon ne kavitaen padheen
aatm-shodh par
prem mein asaphal chhaatraen
adhyaapikaen ban gaee hain
aur ritaayard boodhe
sarvodayee-
aadamee kee sabase achchhee nasl
yuddhon mein nasht ho gaee,
desh ka sabase achchha svaasthy
vidyaalayon mein
sankraamak rogon se grast hai

(mainne raashtr ke karnadhaaron ko
sadako par
kishtiyon kee khoj mein
bhatakate hue dekha hai)

sangharsh kee mudra mein ghaayal purushaarth
bheetar hee bheetar
ek nihshabd visphot se trast hai

pikanik se lautee huee ladakiyaan
prem-geeton se garaare karatee hain
sabase achchhe mastishk,
aaraamakursee par
chitt pade hain.

kuchh soochanaen

579

Add Comment

© 2023 Pothi | All Rights Reserved

Do not copy, Please support by sharing!