loader image

phanda – a story by Acharya Chatursen Shastri

san 1917 ka disambar tha. bhayaanak sardee thee. dillee ke dareebe-muhalle kee ek tang galee mein ek andhere aur gande makaan mein teen praanee the. kotharee ke ek kone mein ek stree baithee huee apane god ke bachche ko doodh pila rahee thee, parantu yah baat saty nahin hai, usake stanon ka praayah sabhee doodh sookh gaya tha aur un be-doodh ke stanon ko bachcha aankh band kie choos raha tha. stree ka munh param sundar hone par bhee is vakt zard aur sookha hua dikhaee de raha tha. yah spasht hee maaloom hota tha ki usake pahale shareer ka sirph asthi-panjar hee rah gaya hai. gaal pichak gae the, aankhen dhans gaee theen aur unake chaaron or neelee rekha pad gaee thee tatha onth murde kee tarah vidarn ho gae the. maano vedana aur daridrata moortimayee hokar us stree ke aakaar mein prakat huee thee. aisee us maata kee god mein vah kankaalaavisht bachcha adh-murda pada tha. usakee avastha aath maheene kee hogee, par vah aath saptaah ka bhee to nahin maaloom hota tha. stree ke nikat hee ek aath varsh ka baalak baitha hua tha, jisakee deh bilkul sookh gaee thee, aur is bhayaanak sardee se bachaane ke yogy usake shareer par ek chithada maatr vastr tha. vah chupachaap bhookha aur badahavaas maan kee bagal mein baitha tukur-tukur usaka munh dekh raha tha.

inase do haath ke phaasale par teen saal kee baalika pet kee aag se ro rahee thee. jab vah rote-rote thak jaatee athava chupachaap aankh band karake pad jaatee thee, par thodee der baad vah phir tadapane lagatee thee. bechaaree asahaay abala vimoodh banee atishay vichalit hokar apane praanon se pyaare bachchon kee yah vedana dekh rahee thee. kabhee-kabhee vah atyant adheer ho kar god ke bachche ko ghoor-ghoor kar dekhane lagatee, do-ek boond aansoo dharak jaate, aur kuchh asphut shabd mukh se nikal padate the, jinhen sun aur kuchh-kuchh samajhakar paas baithe baalak ko kuchh kahane ka saahas nahin hota tha. is chhote se parivaar ko is makaan mein aae aur is jeevan mein rahate paanch maas beet rahe the. paanch maas pratham yah parivaar sukhee aur sampann tha. bachche praatahkaal kaleva kar geet gaate, skool jaate the. isee muhalle mein inaka sundar makaan tha, aur hai, par ek hee ghatana se yahaan tak naubat aa gaee thee. is parivaar ke karnadhaar, ekamaatr svaamee, bachchon ke pita aur dukhiya stree ke jeevan-dhan maastar saahab, jinhen saikadon ameeron aur gareebon ke bachche abhivaadan kar chuke the, jo muhalle ke sujan, hansamukh aur nagar bhar ke pyaare naagarik aur saarvajanik neta the, aaj jel kee deevaaron mein band the, un par jarmanee se shadyantr ka abhiyog pramaanit ho chuka tha aur unhen phaansee kee saja ho chukee thee, ab apeel ke parinaam kee prateeksha thee.

praatahkaal kee dhoop dheere-dheere badh rahee thee. stree ne dheeme, kintu ladakhadaate svar mein kaha-beta vinod…kya tum bahut hee bhookhe ho?

‘nahin to maan…raat hee to mainne rotee khaee thee?’

‘suno-suno, ek-do-teen (is tarah aath tak gin kar) aath baj rahe hain, kirae vaala aata hee hoga.’

‘main usake pairon padakar aur do-teen din taal doonga maan. is baar vah tumhen jara bhee kadee baat na kahane paega.’

stree ne param karuna-saagar kee or kshan-bhar aankh utha kar dekha, aur usakee aankhon se do boonden dharak gaeen.

yah dekharakar chhotee bachchee rona bhool kar maata ke gale mein aakar lipat gaee aur bolee-‘ammaan…ab main kabhee rotee nahin maangoongee.’

haay re maata ka hrday…maata ne donon bachchon ko god mein chhipa kar ek baar achchhee tarah aansoo nikaal daale.

itane hee mein kisee ne karkash shabd se pukaara-‘koee hai na?’

bachche ko chhaatee mein chhipaakar kaanpate-kaanpate stree ne kaha-sarvanaash…vah aa gaya.

ek pachhaiyaan javaan latth lekar darvaaza thel kar bheetar ghus aaya.

use dekhakar hee stree ne atyant kaatar hokar kaha-main tumhaare aane ka matalab samajh gaee hoon.

‘samajh gaee ho to lao kiraaya do.’

‘thoda aur sabr karo.’

‘baalak ne kaha-do-teen din mein ham kiraaya de denge’

baalak ko dhakelate hue uddhatapan se usane kaha-sabr gaya bhaad mein, abhee makaan se nikalo. makaan kya diya, jaan ka bavaal mol le liya, pulis ne ghar ko badanaam kar diya hai. log naam dharate hain, sarakaar ke dushman ko ghar mein chhipa rakkha hai. nikalo, abhee nikalo.

stree khadee ho gaee. dhakka khaakar bachcha gir gaya tha. use utha kar usane kaha-bhaee, museebat vaalon par daya karo, tum bhee baal-bachchedaar ho.

‘main daya-maya kuchh nahin jaanata, main tumase kahe jaata hoon ki aaj din chhipane se pahale-pahale yadi bhaada na chuka diya gaya to aaj raat ko hee nikaal doonga.’

itana kah kar vah vyakti ek baar kadee drshti se teenon abhaage praaniyon ko ghoorata hua jor se daravaaja band karake chala gaya.

dukhiya stree isake baad hee dharatee mein dhadaam se girakar moorchchhit ho gaee.

uparokt ghatana ke kuchh hee minat baad ek adhed avastha ke sabhy purush dheere-dheere makaan mein ghuse. inake aadhe baal pakakar khichadee ho gae the-daant sone kee kamaanee se bandhe the, saaph oonee vastron par ek dushaala pada tha. haath mein chaandee kee moonth kee patalee se ek bent thee. rang gora, kad thigana aur chaal gambheer thee.

unhonne paan kacharate-kacharate bada gharaua jataakar baalak ka naam lekar pukaara-beta vinod…

vinod ne garadan utha kar dekha, bachche kee maata ne saavadhaanee se uth kar apane vastr theek kar lie.

aagantuk ne bina prashn kie hee kaha–dekho apeel ka kya nateeja nikalata hai, ham vilaayat tak ladenge, aage bhagavaan kee marjee.

stree chupachaap baithee rahee, sab sun kar na bolee, na hilee-dulee. is par aagantuk ne anaavashyak prasannata mukh par laakar kaha- kyon re vinod, tera munh kyon utar raha hai? kyon bahoo, kya baat hai-bachchon ka yah haal bana rakha hai, apana to jo kuchh kiya so kiya. is tarah jaan khone se kya hoga? tumase itana kaha, magar tumane ghar chhod diya. maano ham log kuchh hain hee nahin. bhaee sunenge to kya kahenge? main parason jel mein mila tha, bahut khush the. apeel kee unhen badee aasha hai. tumhen bhee khush rahana uchit hai. din to achchhe-bure aate hain aur jaate hain, is tarah sone kee kaaya ko mittee to nahin kiya jaata.

itanee lambee vaktrta sun kar bhee grhinee na bolee, na hilee-doolee. vah vaisee hee achal baithee rahee.

aagantuk ne kuchh ruk kar do rupaye nikaal kar bachche ke haath par dhar die aur kaha-lo beta, jalebiyaan khaana. bachche ne kshan bhar maata ke mukh kee or dekha aur tatkaal haath kheench liya. rupaye dharatee par khann se baj uthe. bachcha peechhe hat kar maan ka aanchal pakad kar khada ho gaya.

aagantuk rupe utha kar unhen phir se dene ko aage badha. grhinee ne baadha dekar kaha-rahane deejie, vah jalebee nahin khaata. ham gareeb vipatti ke maare log hain, ek tukada rotee hee bahut hai. par aap krpa karen to ya to unek baink ke hisaab mein se, makaan ke hisse ko aad karake kuchh rupaye mujhe udhaar de deejie.

‘unek baink ke hisaab mein to bina unake dastakhat ke kuchh milega nahin, phir mujhe maaloom hua hai ki vahaan aisee kuchh rakam hai bhee nahin. raha makaan, so usaka tumhaara vaala hissa rahan rakh kar hee to mukadama ladaaya hai, mukadamen mein kya kam rakam kharch hua hai?’

grhinee chup baithee rahee.

aagantuk ne kaha-main apane paas se jo kaho de doon. tumhen kitane rupaye chaahie?

grhinee ne dheeme svar mein kaha-aapako main kasht nahin dena chaahatee.

‘main kya gair ho gaya?’

stree bolee-nahin

ab aagantuk zara aur paas khisak kar bola-meree baat maano, ghar chalo, sukh se raho. jo hona tha hua, hona hoga ho jaega. kisee ke saath mara to jaata hee nahin hai. mera jagat mein aur kaun hai, tum kya sab baaten samajhatee nahin ho?

‘khoob samajhatee hoon, ab aap krpa kar chale jaayan.’

‘par main jo baat baarambaar kahata hoon, vah samajhatee kyon nahin?’

‘kab kee samajh chukee hoon. tum mujh dukhiya ko sata kar kya paoge? mera raasta chhod do, main yahaan apane din kaatane aaee hoon, aapaka kuchh letee nahin hoon. unaka makaan-jaayadaad sabhee aapake haath hai, aapaka rahe, main keval yahee chaahatee hoon ki aap chale jaie.’

aagantuk ne kade hokar kaha-kya main saanp hoon ya ghinauna kutta hoon?

‘aap jo kuchh hon, mujhe is par vichaar nahin karana hai.’

‘aur tumhaaree yah himmat aur hekadee ab bhee?’

grhinee chup rahee

‘yahaan bhee mere ek ishaare se nikaalee jaogee, phir kya bheekh maangogee?’

grhinee ne koee uttar nahin diya.

aagantuk ne ubaal mein aakar kaha-lo saaf-saaf kahata hoon, tumhen meree baat manjoor hai ya nahin?

grhinee chupachaap bachche ko chhaatee se chhipae baithee rahee. aagantuk ne usaka haath pakad kar kaha-aaj mein idhar-udhar kar ke jaoonga.

stree ne haath jhatak kar kaha-pairon padatee hoon, chale jao.

‘tera himaayatee kaun hai?’

‘main gareeb gaay hoon.’

‘phir laaten kyon chalaatee hai? bol, chalegee?’

‘nahin’

‘meree baat maanegee?’

‘nahin.’

‘tujhe ghamand kisaka hai?’

‘mujhe kuchh ghamand nahin hai.’

‘tujhe aaj raat ko hee sadak par khada hona padega.’

‘bhaagy mein jo likha hai, hoga.’

‘lohe ke take kee aasha na rakhana…’

grhinee khadee ho gaee. usane asvaabhaavik tej-svar mein kaha-door ho…o paapee….bhagavaan se dar, maut jinake ghar mihamaan banee baithee hai, unhen na sata, bhay unhen kya daraega? vishvaasaghaatee bhaee…bhaee ko phansa kar phaansee pahunchaane vaale adharmee…unhen phansaaya, jameen-jaayadaad lee, ab usakee anaath gareeb dukhiya stree kee aabaroo bhee lene kee ichchha karata hai? are paapee, hat ja…hat ja….

aavesh mein aane se stree ka vastr khisak kar neeche gir gaya. vah dasha dekh kar bachche ro uthe.

bade bachche ke munh par jor se tamaacha maar kar aagantuk ne kaha-‘teree paarasaee aaj hee dekh lee jaegee. musalamaan gunde….’ vah kuchh aur na bol saka-vah donon haath meech kar krodh se kaanpane laga.

stree ne kaha-‘ja…ja…paapee-ja…’ aur vah badahavaas chakkar kha kar gir gaee.

donon bachche jor-jor se ro pade. aagantuk tejee se chal diya.

vahee din aur vahee praatahkaal tha, parantu us bhaagyaheen ghar se lagabhag paun meel door dillee kee jel mein ek aur hee drshy saamane tha. jel ke aspataal mein bilkul ek or ek chhotee see kotharee thee. jin kaidiyon ko bilkul ekaant hee mein rahane kee aavashyakata hotee thee, ve hee isamen rakkhe jaate the. is vakt bhee isamen ek kaidee tha. usakee aakrti kitanee ghinaunee, vesh kaisa malin aur cheshta kaisee bhayankar thee? ki of…kaee din se vah kaidee bhayaanak aatmik jvar se tap raha tha, aur kotharee mein rakkha gaya tha.

kotharee badee kaalee, manahoos aur koree anagadhe pattharon kee banee huee thee, aur usamen anaginat makadiyon ke jaale, chhipakaliyaan tatha keede-makode reng rahe the. usamen na saphaee thee, na prakaash. oopar ek chhota sa chhed tha. usee mein se sooraj kee roshanee kamare mein padate hee usakee neend toot gaee. pyaas se usaka kanth sookh raha tha. vah bade kasht se chaarapaee ke ird-gird haath badha kar koee peene kee cheez dhoondhane laga. par use kuchh bhee na mila. tang pyaas kee takaleef se chhatapata kar vah badabadaane laga-‘kaun dekhata hai? kaun sunata hai? haay…itanee laaparavaahee se to log pashuon ko bhee nahin rakhate. doktar mere saamane hee us vaardar se thoda doodh do-teen baar dene aur raat do-teen baar dekhane ko kah gaya tha. par koee kyon paravaah karata? meree neend to raat bhar tootatee rahee hai. mainne pratyek ghanta suna hai. yah pahaad see raat kis takaleeph se kaatee hai…yah kasht to phaansee se adhik hai.’

rogee ab chupachaap kuchh sochane laga. dheere-dheere prakaash ne phail kar kamare ko spasht prakaashamaan kar diya. dheere-dheere usakee pyaas asahy ho chalee, par vah bechaara kar hee sakata tha. vaardar kee khoonkhaar phatakaar se bhayabheet hone par bhee vah ek boond paane ke lie gala phaad kar chillaane laga. par na koee aaya aur na kisee ne javaab hee diya. vah pyaas se bedam ho raha tha-usaka praan nikal jaata tha. vah baarambaar ‘paanee-paanee’ chillaane laga. kabhee anunay-vinay bhee karata, kabhee gaaliyaan bakane lagata.

eeshvar ke lie thoda paanee de jao, haay…ek boond paanee, are main tum logon ko bada kasht dete hoon…par kya karoon, pyaas ke maare mere praan nikal rahe hain. are, main bhee tumhaare jaisa manushy hoon. mujhe is tarah kyon tadapa rahe ho-itanee upeksha to koee baajaaroo kutton kee bhee nahin karata. are aao, nahin to main bichhaune se uth kar, sab daravaaje tod daaloonga aur itanee jor se chillaoonga ki suparintendent ke bangale tak aavaaz pahoonchegee.

is par ek ghinaune mote-taaje adhed vyakti ne chhed mein se sir nikaal kar kaha-are abhaage…kyon itana chillaata hai, kyon duniya kee neend kharaab karata hai?

‘main pyaas ke maare mar raha hoon.’

‘phir mar kyon nahin jaata? too kya samajhata hai ki main tera naukar hoon, kya raat-bhar teree seva mein haajir rahana hee mujhe chaahie?’

isake baad vah ek naukar ko pukaar kar bola-are dekh to…thoda paanee la kar is badamaash ke munh mein daal de. itana hukm dekar vah nishthur phir chal diya. paanee pee kar rogee thakaan ke maare besudh hokar so gaya. yahee kaidee us dukhiya ka saubhaagy-bindu ‘maastar-saahab’ the.

achaanak usee vaardar kee karkash aavaaj sun kar vah chaunk pada. usane chaabiyon se kotharee ka dvaar khola. rogee ekatak dekhane laga. paadaree aur jelar ne kotharee mein gambheer bhaav se pravesh kiya. kuchh jarooree kaagajaat par likha-padhee kee gaee aur kaidee ko suna diya gaya ki usakee apeel naamanjoor ho gaee hai aur aarogy-laabh hote hee use phaansee de dee jaegee.

kaidee ne aankh band karake suna-samajha aur phir usakee aankhen ekatak chhat par atak gaeen.

dheere-dheere donon kamare se baahar nikal aae. isake kuchh kshan baad hee doktar ne kamare mein pravesh karake saavadhaanee se rog-pareeksha kee. phir ek-do meethee baaton ke baad kaha-tumhaaree stree or bachche tumase milane aae hain. rogee ek baar tadapa aur netr utha kar baahar kee or dekhane laga.

doktar ne kaha-is samay jvar nahin hai. main aasha karata hoon, isee saptaah mein tum achchhe ho jaoge.

‘isee saptaah mein?’ rogee ne vikal hokar poochha

doktar ne apanee baat ka samarthan kiya aur dheere-dheere chala gaya.

das baj rahe the. dhoop khoob phailee huee thee. jel ke sadar phaatak par vah abhaaginee ramanee donon bachchon ko saath lie baithee thee. use lagabhag dedh ghanta ho gaya tha. vah apane pati ke darshan karane aaee thee. itanee der baad ek vaardar unhen jel ke bhayaanak phaatak mein lekar chala.

phaatak ko paar karane par ek andhakaarapoorn daalaan mein ve log chale. vahaan se ek andheree galee mein kuchh der chal kar ek lohe ka chhota sa phaatak vaardar ne paas ke bhaaree chaabiyon ke guchchhe se khola. isake baad ve kuchh seedhiyaan chadh kar ek bade se gande daalaan mein pahunche. usake saamane hee bade se makaan ka pichhavaada tha, jisakee oonchee aur chhotee-chhotee khidakiyon se kuchh shor-gul aur bak-jhak kee aavaaj aa rahee thee. saamane kuchh kaidee apanee bediyaan jhanajhanaate idhar-udhar ja rahe the. thodee door chal ne par unhen aspataal kee kaalee imaarat deekh padee, jahaan bhinn-bhinn prakaar ke rogee bichhaune par pade the. kamare kee hava garm aur badaboodaar thee. bistare phate-kate, maile-kuchaile aur ghrnit the. yah sab dekhate-dekhate ramanee ka sir chakkar kha gaya. vah ghabara kar vaheen baith gaee, yah sab dekh chhotee bachchee ro uthee. thodee der baad vah uthee aur is baar svaamee kee kotharee ke paas pahunch gaee. par bheetar opheesar log the. use kuchh der thaharana pada. unake nikalane par doktar ne bheetar pravesh kiya aur doktar ne baahar aakar un logon ko bheetar jaane kee ijaajat dee.

daravaaje ke nikat jaakar usake pair dharatee par jam gae. pahale to vah pati ko dekh hee na paee. peechhe usane saahas karake ek baar dekha. haay…yahee kya usake patidev hain? jeevan ke gyaarah varsh sard-garm jinake saath vyateet kie, vah uthata hua yauvan, ve jeevan kee udeept abhilaashaen, ve ras-rahasy kee amit roop rekhaen hathapoorvak ek ke baad ek netron ke saamane aane lageen. usakee aankhon mein andhera chha gaya, vah vaheen baith gaee.

rogee ne dekha. usane chaarapaee se uth kar donon haath phaila kar unmatt kee tarah kaha-aao beta…are, tum itane hee din mein bina baap ke aise ho gae…yah kah kar rogee-kaidee ne apanee bhujaon mein bachche ko jor se lapet liya aur vah phoot-phoot kar rone laga.

satee baithee hee baithee aage badhee. vah pati ke donon pair pakad, un par sir dhar kar moorchchhit ho gaee. vah ro nahin rahee thee. vah sangya-heen thee. yah sab dekh kar chhotee baalika bhee jor se ro uthee.

use god mein lekar pita rona bhool gaya. usakee aankhon mein kshan bhar aankh mila kar vah hansee thee. ant mein usane bharraee aavaaj mein kaha-leela, meree betee, meree bitiya….

isake baad use chhaatee se laga kar kaidee chupachaap rone laga. badee der tak sannaata raha. phir bachchon ko alag karake vah svasth hokar patnee kee or dekhane laga. balapoorvak usane shok ke umadate veg ko roka. usane kshan bhar aakaash mein drshti karake ek baar sarvashaktimaan parameshvar se bal-yaachana kee. phir usane madhur svar mein kaha-itana adheer mat ho. dhyaan se meree baat suno.

ramanee ne sir nahin uthaaya. pati ne dheere-dheere usake sir par haath pherate hue kaha-naadaanee na karana, varana in bachchon ka kaheen thikaana nahin hai. eeshvar par vishvaas rakho-mera vinod bada hokar tumhaare sabhee sankat kaatega. ‘sab din hot na ek samaan….’

saadhvee sisak-sisak kar ro rahee thee. use dhaadhas dena kathin tha, parantu abhee kuchh minit pratham mrtyu ka sandesh paakar bhee kaidee vah kathin kaam kar raha tha.

vah poochhana chaahatee thee-‘kya ab kuchh bhee aasha nahin hai?’ parantu usamen bolane aur pati ko dekhane tak ka saahas na tha. samast saahas bator kar usane ek baar pati kee or aankh bhar kar dekha. ve aankhen aansoo aur prashnon se paripoorn, mook vedana se andhee aur mrt abhilaashaon kee shmasaan-bhoomi…pratikshan kya-kya kah rahee thee?

parantu maanav-hrday jitana sukh mein durbal ban jaata hai, utana hee dukh mein sabal ho jaata hai. maastar saahab ne usaka haath paqad kar kaha-ab is tarah mujhe dekh kar, is dasha mein kaayar na banao…tum bachchon kee maata ho. jaise pati kee patnee raheen vaise hee bachchon kee maan banana…prateeksha karo, tumane mujhe kabhee nahin thaga, ab bhee na thagana.

satee kee vaanee phatee, usane kaha-svaamee jee…mujhe sahaara do. main chaloongee, nahin…main chaloongee.

ek ati madhur unmaad usake hothon par phadak raha tha. maastar saahab vichalit hue, unhonne sankoch tyaag, dheere se us unmukh unmaad ka ek saral chumban liya. vah vaasanaaheen, indriy-vishay aur shareer-bhaavana se rahit chumban kya tha, do amar tatv pratibimbit ho rahe the.

maastar saahab nekuchh kahane kee ichchha se honth khole the, par vaardar ne karkash aavaaj mein kaha-chalo, vakt ho gaya.

rogee kaidee ne maano dhaak khaakar ek baar use dekha, aur kaha-zara aur thahar jao bhaee.

‘hukm nahin hai’ kah kar vah bheetar ghus aaya. usane ekadam ramanee ke sir par khade hokar kaha-baahar jao.

lajja aur sankoch tyaag kar vah kuchh kaha chaahatee thee, maastar jee ne sanket se kaha-‘usase kuchh mat kahana..achchha…ab vida priye…bete…ammaan ko dukhee na karana, meree bitiya…’ yah kah kar aur ek baar besabree se unhonne use pakad kar anaginat chumban le daale.

ramanee kee gambheerata ab na rah sakee. vah gaay kee tarah dakaraatee vaheen gir gaee aur nishthur vaardar ne use ghaseet kar baahar kiya aur taala band kar diya, donon bachche cheetkaar kar ro uthe. yah dekh kar maastar saahab asahy-vedana se moorchchhit hokar dhadaam se chaarapaee par gir pade.

ravivaar hee kee sandhya ko isakee soochana abhaaginee ko de dee gaee thee. vah raat-bhar dharatee mein padee rahee, kshan bhar ko bhee usakee aankhon mein neend nahin aaee thee. chaar din se usane jal kee ek boond bhee munh mein nahin daalee thee.

somavaar ko praatahkaal badee sardee thee. ghana kohara chhaaya hua tha. thandee-thandee hava chal rahee thee. theek saadhe chhah baje ka vah samay niyat kiya gaya tha. theek samay par phaansee ka juloos andh-kotharee se chala. maastar saahab dheer-gambheer gati se aage badh rahe the. is samay unhonne hajaamat banavaee thee. ve apane nijee vastr pahane the. door se dekhane mein durbal hone ke siva aur kuchh antar na deekhata tha. ve maano kisee gahan vishay ko sochate hue vyaakhyaan dene rang-manch par aa rahe the. unake aage khulee pustak haath mein lie paadaree kuchh vaaky uchchaaran kar raha tha. unake peechhe jelar apanee pooree poshaak mein the. unakee bagal mein maijistret aur doktar bhee chal rahe the. kshan bhar takhte par khade rahane ke baad jallaad ne unake gale mein rassee daal dee. paadaree ne kaha-main praarthana karata hoon ki eeshvar tumhaaree aatma ko shaanti pradaan kare.

maastar saahab ne kaha-chup raho, main praarthana karata hoon ki eeshvar meree aatma ko jvalant ashaanti de, jo tab tak na mite, jab tak mera desh svaadheen na ho jaay, aur mere desh ka pratyek vyakti shaanti na praapt kar le.

isake baad unhonne geeta kee pustak ko haath mein lekar aankhon aur mastak se lagaaya aur donon haathon mein lekar peechhe haath kar lie. jallaad ne usee dasha mein haath peechhe baandh die. maastar saahab netr band karake kuchh asphut uchchaaran karane lage. jallaad ne tabhee ek kaalee topee se unaka munh dhank diya, aur vah chabootare se neeche kood pada. paadaree kuchh uchchaaran karane lage. maijistret aur jelar ne topiyaan utaar leen. hathaat takhtee kheench lee gaee, aur unaka vivash shareer shoony mein jhoolane aur chhatapataane laga. par thodee der mein aaveg shaant ho gaya.

is ghatana ke aadha ghanta baad vahee poorv parichit bhadr purush lapake hue, satee kee kutiya par gae. dvaar khule the. bheetar donon bachche betahaasha ro rahe the, aur unakee maata rasoee ke kamare mein ek rassee ke sahaare nirjeev latak rahee thee.

Add Comment

© 2021 Pothi | All Rights Reserved

Do not copy, Please support by sharing!