loader image

eid – a nazm by Vafa Barahi

kaho ye mugannee se gae chala ja
nava-e-masarrat sunae chala ja
masarrat ke muzde ko lae chala ja
zamaane ko be-khud banae chala ja
zamaane pe chhaee hai eid-e-masarrat
dulhan ban ke aaee hai eid-e-masarrat
munaasib hai kuchh intizaam-e-masarrat
karoon khalq ko shaad-kaam-e-masarrat
liye jaoon main dil se naam-e-masarrat
salaam-e-masarrat kalaam-e-masarrat
masarrat bhee apanee jagah jhoomatee hai
qadam eed ka ab khushee choomatee hai
vatan kee mohabbat ke nagme ko ga kar
hareefon ko apane gale se laga kar
mohabbat se gairon ko qaaboo mein la kar
jo roothe hue hain unhen bhee mana kar
manao khushee eid kee roza-daaro
dikhao khushee eid kee roza-daaro

785
By: Vafa Barahi

© 2022 Pothi | All Rights Reserved

Do not copy, Please support by sharing!