ek din sahasa
sooraj nikala
are kshitij par nahin,
nagar ke chauk :
dhoop barasee
par antariksh se nahin,
phatee mittee se.
chhaayaen maanav-jan kee
dishaaheen
sab or padeen – vah sooraj
nahin uga tha poorab mein, vah
barasa sahasa
beechon-beech nagar ke :
kaal-soory ke rath ke
pahiyon ke jyon are toot kar
bikhar gaye hon
dason disha mein.
kuchh kshan ka vah uday-ast!
keval ek prajvalit kshan kee
drshy sokh lene vaalee dopaharee.
phir?
chhaayaen maanav-jan kee
nahin miteen lambee ho-ho kar :
maanav hee sab bhaap ho gaye.
chhaayaen to abhee likhee hain
jhulase hue pattharon par
ujadee sadakon kee gach par.
maanav ka racha hua sooraj
maanav ko bhaap bana kar sokh gaya.
patthar par likhee huee yah
jalee huee chhaaya
maanav kee saakhee hai.