loader image

kalagee baajare kee – a poem by Agyeya

haree bichhalee ghaas.
dolatee kalagee chharahare baajare kee.

agar main tum ko lalaatee saanjh ke nabh kee akelee taarika
ab nahin kahata,
ya sharad ke bhor kee neehaar-nhaayee kunee,
tatakee kalee champe kee, vagairah, to
nahin kaaran ki mera hrday uthala ya soona hai
ya ki mera pyaar maila hai.

balki keval yahee : ye upamaan maile ho gaye hain.
devata in prateekon ke kar gaye hain kooch.

kabhee baasan adhik ghisane se mulamma chhoot jaata hai.
magar kya tum nahin pahachaan paogee :
tumhaare roop ke – tum ho, nikat ho, isee jaadoo ke –
nijee kisee sahaj, gahare bodh se, kis pyaar se main kah raha hoon –
agar main yah kahoon –
bichhalee ghaas ho
tum lahalahaatee hava mein kalagee chharahare baajare kee?

aaj ham shaharaatiyon ko
paalatoo maalanch par sanvaree juhee ke phool se
srshti ke vistaar ka – aishvary ka – audaary ka-
kaheen sachcha, kaheen pyaara ek prateek
bichhalee ghaas hai,
ya sharad kee saanjh ke soone gagan kee peethika par dolatee kalagee akelee
baajare kee.

aur sachamuch, inhen jab-jab dekhata hoon
yah khula veeraan sansrti ka ghana ho simat aata hai –
aur main ekaant hota hoon samarpit

shabd jaadoo hain –
magar kya samarpan kuchh nahin hai?

Add Comment

© 2021 Pothi | All Rights Reserved

Do not copy, Please support by sharing!