shabd
sampatti hai,
poonjee hai
use vyarth mat jaane do
chaar kee jagah do ko
apanee baat sunaane do
jahaan ek bhee jyaada lage
vahaan
aadhe se kaam lo
jahaan aadha bhee jyaada lage
vahaan
usake aadhe par viraam lage
aur phir
sanketon kee bhaasha
samajhane do logon ko
phir
maun kee paribhaasha
samajhane do logon ko
jyon jyon tumhaara maun
mukhar hota jaega
tyon tyon tumhaara shabd
prakhar hota jaega
shabd brahm hai jo maun se praapt hota hai
maun mein jeeta hai
aur maun mein hee samaapt hota hai.
Closeclose