loader image

haq vafa ke jo ham jataane lage

haq vafa ke jo ham jataane lage
aap kuchh kah ke muskuraane lage

tha yahaan dil mein taan-e-vasl-e-adoo
uzr un kee zabaan pe aane lage

ham ko jeena padega furqat mein
vo agar himmat aazamaane lage

dar hai meree zabaan na khul jae
ab vo baaten bahut banaane lage

jaan bachatee nazar nahin aatee
gair ulfat bahut jataane lage

tum ko karana padega uzr-e-jafa
ham agar dard-e-dil sunaane lage

sakht mushkil hai sheva-e-tasleem
ham bhee aakhir ko jee churaane lage

jee mein hai loon raza-e-peer-e-mugaan
qaafile phir haram ko jaane lage

sirr-e-baatin ko faash kar ya rab
ahal-e-zaahir bahut sataane lage

vaqt-e-rukhsat tha sakht ‘haalee’ par
ham bhee baithe the jab vo jaane lage!

Add Comment

By: Altaf Hussain Hali

© 2022 Pothi | All Rights Reserved

Do not copy, Please support by sharing!