jhutapute ke vaqt ghar se ek mittee ka diya
ek budhiya ne sar-e-rah la ke raushan kar diya
taaki rah-geer aur paradesee kaheen thokar na khaen
raah se aasaan guzar jae har ek chhota bada
ye diya behatar hai un jhaadon se aur us laimp se
raushanee mahalon ke andar hee rahee jin kee sada
gar nikal kar ik zara mahalon se baahar dekhie
hai andhera ghup dar-o-deevaar par chhaaya hua
surkh-roo aafaaq mein vo rahanuma meenaar hain
raushanee se jin kee mallaahon ke bede paar hain
ham ne in aalee binaon se kiya aksar savaal
aashkaara jin se un ke baaniyon ka hai jalaal
shaan-o-shaukat kee tumhaaree dhoom hai aafaaq mein
door se aa aa ke tum ko dekhate hain ba-kamaal
qaum ko is shaan-o-shaukat se tumhaaree kya mila
do javaab is ka agar rakhatee ho yaara-e-maqaal
sar-nigoon ho kar vo sab boleen zabaan-e-haal se
ho saka ham se na kuchh al-infiaal al-infiaal
baaniyon ne tha banaaya is lie goya hamen
ham ko jab dekhen khalaf aslaaf ko roya karen
shauq se us ne banaaya maqabara ik shaanadaar
aur chhoda us ne ik aivaan-e-aalee yaadagaar
ek ne duniya ke paude baag mein apane lagae
ek ne chhode dafeene seem-o-zar ke be-shumaar
ik muhibb-e-qaum ne apane mubaarak haath se
qaum kee taaleem kee buniyaad daalee ustuvaar
hogee aalam mein kaho sarasabz ye pichhalee muraad
ya vo agalon kee umeeden laengee kuchh barg-o-baar
chashma-e-sar jyoon hai jo bahata rahega yaan vahee
sab utar jaengee chadh chadh naddiyaan barasaat kee..