srishti kee pahalee subah thee vah!
kaha gaya mujhase
too ujiyaara hai dharatee ka
aur chheen liya gaya mera sooraj!
kaha gaya mujhase
too bulabul hai is baag ka
aur jhapat liya gaya mera aakaash!
kaha gaya mujhase
too paanee hai srishti kee aankhon ka
aur mujhe byaaha gaya ret se
sukha diya gaya mera saagar!
kaha gaya mujhase
too bimb hai sabase sundar
aur tod diya gaya mera darpan!
baaba kabeer kee kavita kee maatee kee tarah nahin,
pepar maishee kee lugadee kee tarah
mujhe ‘roonda’ gaya,
kisee-kisee tarah main uthee,
ek pratima banee meree,
koee tha jisane darpan kee kirachiyaan uthaayeen
aur rom-rom mein pratima ke jad dee!
ek brahmaand hee paraavartit tha
rom-rom mein ab to!
jo sooraj chheen liya tha mujhase
daudata hua aa gaya vaapas
aur hapas kar mere ang lag gaya!
aakaash khud ek panchhee-sa
mere kandhe par utar aaya |
vaqt-sa samundar mere paanv par bichh gaya,
dhul gayee ab yugon kee keechad!
ab main vyavasthit thee!
pooree yah kaayanaat hee mera ghar thee ab!
apane das haathon se
karane lagee kaam ghar ke aur baahar ke!
ek ghareloo durga
bhaale par jhaadan lapet liya mainne
aur lagee dhool jhaadane
qaayadon kee, vaayadon kee, rasmon kee, mithakon kee,
itihaas kee mez bhee jhaadee!
mahishaasur ke mainne kaat die naakhoon,
nahalaakar bhej diya daftar!
ek nayee srishti ab
machal rahee thee mere bheetar!