loader image

bechaare purush – a poem by Aparna Dewal

bhindee mein ajavain aur raayate mein saabut dhaniye ka chhonk to main laga doongee,
yah koshish bhee kar loongee ki har phulka poora phoole,
pyaaj kaatana aur achaar-paapad rakhana bhee nahin bhooloongee,
paas baithakar jimaoongee tumhen…
lekin tumhen nahin parosoongee apane antas ka ek bhee vichaar,
mujhe tumhaaree sameekshaen nahin chaahie
bechaare purush!

tum mujhe stree se vyakti kabhee nahin hone doge na!
to suno! main bhee tumhen sirf purush hee kahoongee
mujhe stree rakhane ko tum bhee vyakti na ho paoge
rah jaoge
bechaare purush

tum na naaraaz mat hua karo,
main aksar baaten bhool jaatee hoon,
achchha suno! vo tumane kaha tha na,
tumhen achchha lagega,
mera achaanak tumase aakar kahana
main bhool gaee hoon, ek baar phir se bata do na,
din mein kitanee baar aur kab-kab,
khaalee pet ya khaana khilaane ke baad aur kis tarah kahana hai
aaee lav yoo!

haan main stree hoon,
aur triyaacharitr bhee,
kya karoon ki meree chhotee se chhotee baat tumhen samajh nahin aatee,
main kahatee hoon ki mujhe saans nahin aa rahee,
tum kahate ho ki main paagal hoon,
sochana band kar doon

tum hans dete ho mujh par,
mere paagalapan ke qisson par,
aur tumhaare us attahaas ke beech main sochana band nahin kar paatee
aur paagal ho uthatee hoon
kar detee hoon tukade teen apanee har ek baat ke
aur phir teen bhaant kee baat karatee hoon main
main hoon triyaacharitr
mere jeene kee aur tumhaare hone kee soorat hai yah!

ab kya kahoon main tumhaare paurush ko,
ki bahut kuchh anachhua hai ab bhee mere bheetar

jo kahee hotee geeta kisee stree ne kabhee
to kahatee aatmaen sab mar jaatee hain,
bas deh amar rahatee hain!

bas ek vaheen aakar to tum sab kuchh haar jaate ho,
bas vaheen aakar to main sab kuchh jeet jaatee hoon,
main sab dekar bhee reetatee nahin
tum sab paakar bhee dhaapate nahin
pata hai kyon… bechaare purush!
kyonki main stree hoon, aur main keval deh nahin hoon!

ladakee hansatee hai

ladakee hansatee hai har baar,
jab koee kahata hai-
tum bahut bholee ho aur duniya bahut kharaab
ladakee hansatee hai kyonki jaanatee hai vo
ki na to duniya itanee buree hai,
na hee vo bahut bholee,
ladakee ab raajaneeti samajhatee hai!

Add Comment

By: Aparna Dewal

© 2021 Pothi | All Rights Reserved

Do not copy, Please support by sharing!