ek nahin do nahin karo beeson samajhaute,
par svatantr bhaarat ka mastak nahin jhukega.
aganit balidaano se arjit yah svatantrata,
ashru sved shonit se sinchit yah svatantrata.
tyaag tej tapabal se rakshit yah svatantrata,
dukhee manujata ke hit arpit yah svatantrata.
ise mitaane kee saajish karane vaalon se kah do,
chinagaaree ka khel bura hota hai.
auron ke ghar aag lagaane ka jo sapana,
vo apane hee ghar mein sada khara hota hai.
apane hee haathon tum apanee kabr na khodo,
apane pairon aap kulhaadee nahin chalao.
o naadaan padosee apanee aankhe kholo,
aajaadee anamol na isaka mol lagao.
par tum kya jaano aajaadee kya hotee hai?
tumhe muft mein milee na keemat gayee chukaee.
angrejon ke bal par do tukade paaye hain,
maan ko khandit karate tumako laaj na aaee?
amareekee shastron se apanee aajaadee ko
duniya mein kaayam rakh loge, yah mat samajho.
das bees arab daalar lekar aane vaalee barabaadee se
tum bach loge yah mat samajho.
dhamakee, jihaad ke naaron se, hathiyaaron se
kashmeer kabhee hathiya loge yah mat samajho.
hamalo se, atyaachaaron se, sanhaaron se
bhaarat ka sheesh jhuka loge yah mat samajho.
jab tak ganga me dhaar, sindhu me jvaar,
agni mein jalan, soory mein tapan shesh,
svaatantry samar kee vedee par arpit honge
aganit jeevan yauvan ashesh.
amareeka kya sansaar bhale hee ho viruddh,
kaashmeer par bhaarat ka sar nahee jhukega
ek nahin do nahin karo beeson samajhaute,
par svatantr bhaarat ka nishchay nahin rukega.
padosee se