loader image

Famous sher of Bhartendu Harishchandra

aa jae na dil aap ka bhee aur kisee par
dekho miree jaan aankh ladaana nahin achchha


ye chaar din ke tamaashe hain aah duniya ke
raha jahaan mein sikandar na aur na jam baaqee


na bosa lene dete hain na lagate hain gale mere
abhee kam-umr hain har baat par mujh se jhijakate hain


gulaabee gaal par kuchh rang mujh ko bhee jamaane do
manaane do mujhe bhee jaan-e-man tyauhaar holee mein


rukh-e-raushan pe us kee gesoo-e-shab-goon latakate hain
qayaamat hai musaafir raasta din ko bhatakate hain


kisee pahaloo nahin chain aata hai ushshaaq ko tere
tadapate hain fugaan karate hain aur karavat badalate hain


abhee to aae ho jaldee kahaan hai jaane kee
utho na pahaloo se thaharo zara kidhar ko chale


jahaan dekho vahaan maujood mera krshn pyaara hai
usee ka sab hai jalva jo jahaan mein aashkaara hai


but-e-kaafir jo too mujh se khafa ho
nahin kuchh khauf mera bhee khuda hai


gaafil itana husn pe garra dhyaan kidhar hai tauba kar
aakhir ik din soorat ye sab mittee mein mil jaegee


986

Add Comment

By: Bhartendu Harishchandra

© 2023 Pothi | All Rights Reserved

Do not copy, Please support by sharing!