loader image

phirozee hoth – a poem by Dharamveer Bharti

barabaad meree zindagee
in phirozee hothon par

gulaabee paankhuree par halkee suramee aabha
ki jyon karavat badal letee kabhee barasaat kee dupahar
in phirozee hothon par

tumhaare sparsh kee baadal-dhulee kachanaar naramaee
tumhaare vaksh kee jaadoo bharee madahosh garamaee
tumhaaree chitavanon mein nargison kee paant sharamaee
kisee kee mol par main aaj apane ko luta sakata
sikhaane ko kaha
mujhase pranay ke devataon ne
tumhen aadim gunaahon ka ajab-sa indradhanushee svaad
meree zindagee barabaad !

andheree raat mein khilate hue bele-sareekha man
mrnaalon kee mulaayam baanh ne seekhee nahin ulajhan
suhaagan laaj mein lipata sharad kee dhoop jaisa tan
pankhuriyon par bhanvar-sa man tootata jaata
mujhe to vaasana ka
vish hamesha ban gaya amrt
basharte vaasana bhee ho tumhaare roop se aabaad
meree zindagee barabaad !

gunaahon se kabhee mailee padee bedaag tarunaee —
sitaaron kee jalan se baadalon par aanch kab aaee
na chanda ko kabhee vyaapee ama kee ghos kajaraee
bada maasoom hota hai gunaahon ka samarpan bhee
hamesha aadamee
majaboor hokar laut aata hai
jahaan har mukti ke, har tyaag ke, har saadhana ke baad
meree zindagee barabaad !

452

Add Comment

By: Dharamveer Bharti

© 2022 Pothi | All Rights Reserved

Do not copy, Please support by sharing!