meree pragati ya agati ka
yah maapadand badalo tum,
jue ke patte-sa
main abhee anishchit hoon .
mujh par har or se choten pad rahee hain,
kopalen ug rahee hain,
pattiyaan jhad rahee hain,
main naya banane ke lie kharaad par chadh raha hoon,
ladata hua
naee raah gadhata hua aage badh raha hoon .
agar is ladaee mein meree saansen ukhad gaeen,
mere baazoo toot gae,
mere charanon mein aandhiyon ke samooh thahar gae,
mere adharon par tarangaakul sangeet jam gaya,
ya mere maathe par sharm kee lakeeren khinch gaeen,
to mujhe paraajit mat maanana,
samajhana –
tab aur bhee bade paimaane par
mere hrday mein asantosh ubal raha hoga,
meree ummeedon ke sainikon kee paraajit panktiyaan
ek baar aur
shakti aazamaane ko
dhool mein kho jaane ya kuchh ho jaane ko
machal rahee hongee .
ek aur avasar kee prateeksha mein
man kee qandeelen jal rahee hongee .
ye jo phaphole taluon me deekh rahe hain
ye mujhako ukasaate hain .
pindaliyon kee ubharee huee nasen
mujh par vyangy karatee hain .
munh par padee huee yauvan kee jhurriyaan
qasam detee hain .
kuchh ho ab, tay hai –
mujhako aashankaon par qaaboo paana hai,
pattharon ke seene mein
pratidhvani jagaate hue
parichit un raahon mein ek baar
vijay-geet gaate hue jaana hai –
jinamen main haar chuka hoon .
meree pragati ya agati ka
yah maapadand badalo tum
main abhee anishchit hoon .