loader image

saharsh sveekaara hai – a poem by Muktibodh

zindagee mein jo kuchh hai, jo bhee hai
saharsh sveekaara hai;
isalie ki jo kuchh bhee mera hai
vah tumhen pyaara hai.
garabeelee gareebee yah, ye gambheer anubhav sab
yah vichaar-vaibhav sab
drdhta yah, bheetar kee sarita yah abhinav sab
maulik hai, maulik hai
isalie ke pal-pal mein
jo kuchh bhee jaagrat hai apalak hai–
sanvedan tumhaara hai !!

jaane kya rishta hai,jaane kya naata hai
jitana bhee undelata hoon,bhar bhar phir aata hai
dil mein kya jharana hai?
meethe paanee ka sota hai
bheetar vah, oopar tum
musakaata chaand jyon dharatee par raat-bhar
mujh par tyon tumhaara hee khilata vah chehara hai!

sachamuch mujhe dand do ki bhooloon main bhooloon main
tumhen bhool jaane kee
dakshin dhruvee andhakaar-amaavasya
shareer par,chehare par, antar mein pa loon main
jheloon mai, usee mein naha loon main
isalie ki tumase hee pariveshtit aachchhaadit
rahane ka ramaneey yah ujela ab
saha nahin jaata hai.
nahin saha jaata hai.
mamata ke baadal kee mandaraatee komalata–
bheetar piraatee hai
kamazor aur aksham ab ho gayee hai aatma yah
chhatapataatee chhaatee ko bhavitavyata daraatee hai
bahalaatee sahalaatee aatmeeyata baradaasht nahee hotee hai !!!

sachamuch mujhe dand do ki ho jaoon
paataalee andhere kee guhaon mein vivaron mein
dhuen ke baadlon mein
bilakul main laapata!!
laapata ki vahaan bhee to tumhaara hee sahaara hai!!
isalie ki jo kuchh bhee mera hai
ya mera jo hota-sa lagata hai, hota sa sambhav hai
sabhee vah tumhaare hee kaaran ke kaaryon ka ghera hai, kaaryon ka vaibhav hai
ab tak to zindagee mein jo kuchh tha, jo kuchh hai
saharsh sveekaara hai
isalie ki jo kuchh bhee mera hai
vah tumhen pyaara hai .

393

Add Comment

© 2022 Pothi | All Rights Reserved

Do not copy, Please support by sharing!