eeshvar ke avataar hue hain, birjoo bhaiya,
par kitane laachaar hue hain, birjoo bhaiya.
horee ke sirahaane koree raat bitaee,
phir chaahe beemaar hue hain, birjoo bhaiya.
dhaniya kee vidhava ladakee ka byaah karaane,
khet bechakar khvaar hue hain, birjoo bhaiya.
sukh-du:kh mein sab logon ke hamaraahee banakar,
ek bada parivaar hue hain, birjoo bhaiya.
braahman-kshatri-vaishy-shoodr se oopar uthakar,
maanav ke aakaar hue hain, birjoo bhaiya.
maan-bahanen to theek, gaay-bachhiya roe to
karoona kee jaladhaar hue hain, birjoo bhaiya.
holee aur divaalee ho ya eed-muharram,
ghar-ghar ke tyauhaar hue hain, birjoo bhaiya.
baalak, boodhe o javaan ke dil mein soee,
jeevan kee lalakaar hue hain, birjoo bhaiya.
par chunaav mein khade hue jab isee gaanv se,
kuchh badale aasaar hue hain, birjoo bhaiya.
jab chunaav mein jeet gae to kaam bhoolakar,
keval jay-jayakaar hue hain, birjoo bhaiya.
ab sunate hain – dillee kee sansad mein jaakar
milee-julee sarakaar hue hain, birjoo bhaiya.
sarakaaree shishtaachaaron mein aise doobe,
poore bhrashtaachaar hue hain, birjoo bhaiya.
kal kavita the, kaareegar the o kisaan the,
kintu aaj kaladaar hue hain, birjoo bhaiya.
satta to upahaar nahin, upahaas ho gaee
kahane ko laachaar hue hain, birjoo bhaiya.
kintu kaun sunata satta ke galiyaare mein?
shabd yahaan bekaar hue hain, birjoo bhaiya.